بیجنګ پر امریکا تور ولګاوه چې د هند او چین اړیکو د ښه کېدو مخه نیسي
چین د پنجشنبې په ورځ امریکا تورنه کړه چې د چین د دفاعي پالیسۍ ناسم انځور وړاندې کوي او په دې توګه د بیجنګ او نوي ډیلي ترمنځ د اړیکو د ښه کېدو مخه ونیسي.
چین د پنجشنبې په ورځ امریکا تورنه کړه چې د چین د دفاعي پالیسۍ ناسم انځور وړاندې کوي او په دې توګه د بیجنګ او نوي ډیلي ترمنځ د اړیکو د ښه کېدو مخه ونیسي.
د چین د بهرنیو چارو وزارت ویاند لین جیان دا څرګندونې د یوې خبري ناستې پر مهال د یوې پوښتنې په ځواب کې وکړې.
له هغه وپوښتل شول چې ایا چین به له هند سره د لانجمنو سرحدي سیمو پر سر د وروستیو کړکېچونو له کمېدو ګټه واخلي، څو د امریکا او هند ترمنځ د اړیکو د لا ژورېدو مخه ونیسي؟ لین جیان وویل چې بیجنګ له هند سره خپلې اړیکې په ستراتیژیک او اوږدمهاله لیدلوري ارزوي.
هغه زیاته کړه چې د سرحد مساله یوازې د چین او هند ترمنځ موضوع ده او «موږ د دې موضوع په اړه د هر بل هېواد د قضاوت مخالفت کوو».
بل خوا د امریکا دفاع وزارت (پنتاګون) د سې شنبې په ورځ په خپل راپور کې ویلي چې چین «ښايي هڅه وکړي د تاوتریخوالي له کمېدو ګټه واخلي څو خپلې دوهاړخیزې اړیکې باثباته کړي او د امریکا او هند ترمنځ د اړیکو د ژورېدو مخه ونیسي».
