په پاکستان کې د روانو ناامنیو پر دوام د پاکستان د شخړو او امنیت د مطالعاتو انسټیټیوټ راپور ورکړی، چې د ۲۰۲۵ کال په ترڅ کې له شخړو سره تړلې مړینې ۷۳ سلنه زیاتې شوې دي. د راپور لهمخې، په دې موده کې ۲۱۱۵ وسلهوال، ۶۶۴ امنیتي ځواکونه او ۵۸۰ ملکي وګړي وژل شوي دي.
په دې راپور کې ویل شوي، چې روان کال له ۲۰۱۵م راهیسې د وسلهوالو لپاره تر ټولو خونړی، له ۲۰۱۱م کال راهیسې د امنیتي ځواکونو لپاره تر ټولو وژونکی او په وروستۍ لسیزه کې د ملکي تلفاتو له پلوه تر ټولو خراب کال ګڼل شوی دی.
دغه انسټیټیوټ راپور ورکړی، چې په یاده موده کې د دولتپلوه د سولې د کمېټو ۲۸ غړي هم په بېلابېلو بریدونو کې وژل شوي دي. د دې ادارې په تېر کال راپور کې له ترهګرۍ سره تړلي ۱۹۵۰ مړینې ثبت شوې وې.
د پاکستان د شخړو او امنیت د مطالعاتو انسټیټیوټ ویلي، دغه هېواد په ۲۰۲۵ کال کې د تاوتریخوالي له "بېساري زیاتوالي" سره مخ و، هم د شدت او هم د پېښو له اړخه چې په وروستیو کلونو کې تر ټولو لوړې کچې ته رسېدلی دی.
په راپور کې راغلي: «له ۲۰۱۴م کال وروسته په روان کال کې وسلهوالو تر ټولو زیات ترهګریز بریدونه کړي او د ځانمرګو بریدونو او کوچنيو ډرونونو کارول هم د زیاتوالي په حال کې دي.»
د راپور لهمخې، سږ کال د امنیتي ځواکونو د تلفاتو شمېر د تېر کال په پرتله ۲۶ سلنه زیات شوی او د ملکي وګړو مرګژوبله هم د ۲۰۲۴ کال په پرتله ۲۴ سلنه لوړه شوې ده.
د یاد انسټیټیوټ په راپور کې زیاته شوې، چې په ۲۰۲۵ کال کې ټولټال ۲۲۶۳ تنه ټپیان شوي، چې پهکې ۱۰۲۵ امنیتي ځواکونه، ۹۸۲ ملکي وګړي، ۲۲۸ وسلهوال او ۲۸ د سولې له دولتي کمېټو سره تړلي غړي شامل دي.
په اسلاماباد کې د مېشتې دې ادارې د راپور لهمخې، په روان میلادي کال کې په پاکستان کې له ترهګرۍ سره تړلي نیونې ۸۳ سلنه زیاتې شوې دي او په دې موده کې ۴۹۷ مشکوک کسان نیول شوي دي.
دې انسټیټیوټ ویلي، چې په روان کال کې په ټول پاکستان کې ۱۰۶۳ ترهګریز بریدونه شوي دي او همداراز د ځانمرګو بریدونو شمېر ۵۳ سلنه زیات شوی دی.
دغه راپور په داسې حال کې خپرېږي، چې پاکستاني چارواکي د دې هېواد د ناامنۍ پړه پر افغانستان اچوي. هغوی تر دې وړاندې هم څو ځله ادعا کړې، چې طالبان د افغانستان په خاوره کې د «ټيټيپي» په ګډون د پاکستان ضد وسلهوالو ډلو ته پناه ورکړې او دا ډلې له هغه ځایه د ترهګریزو بریدونو پلانونه جوړوي، خو طالبانو بیا دا ادعاوې بیا-بیا رد کړې دي.
