د پاکستان پوځ وايي، د بلوچستان د پنجګور ولسوالۍ اړوند ایران پولې ته نږدې یې په استخباراتي عملیاتو کې څلور وسلهوال وژلي دي. پوځ دغه وژل شوي وسلهوال د ټيټيپي غړي بللي، په داسې حال کې چې د راپورونو پر بنسټ، ټيټيپي تر ډېره په پښتونخوا کې فعاله ده.
د پاکستان پوځ د شنبې په ورځ د یوې خبرپاڼې په خپرولو سره ویلي، په دې استخباراتي عملیاتو کې د یادو وسلهوالو پټنځای لهمنځه وړل شوی او دغه عملیات همداراز دوام لري.
خبرپاڼه زیاتوي، دغو کسانو په ګڼو بریدونو کې لاس درلود او په یادو عملیاتو کې یو شمېر وسلې، مهمات او یوه اندازه چاودېدونکي توکي هم ترلاسه شوي دي.
بلوچستان چې د پاکستان تر ټولو لوی، خو تر ټولو لږ نفوس لرونکی ولایت دی له کلونو راهیسې د بېلتونپالو ډلو لکه د بلوچستان د ازادۍ (BLA) د وسلهوالو مرکز پاتې شوی، خو د راپورونو پر بنسټ په دغه ولایت کې د ټيټيپي د غړو فعالیت پیکه دی.
