د افغانستان د ۱۹ کلنو کرېکټ ملي لوبډله سبا د غرمې ۱۲ بجې د زېمبابوې د ۱۹ کلنو لوبډلې پر وړاندې یوه مهمه سیالي ترسره کوي. دا لوبه د زېمبابوې د درېاړخیزو نړۍوالو سیالیو په لړ کې ده او د افغانستان لپاره چې دا مهال د جدول په پای کې دی، له امتیازي پلوه خورا مهمه بلل کېږي.
د افغانستان ۱۹ کلنو لوبډلې په دې سیالیو کې تر اوسه یوازې یو امتیاز ترلاسه کړی، هغه هم له زېمبابوې سره د لومړۍ لوبې له امله چې د باران له کبله نیمه پاتې شوه. په دویمه لوبه کې بیا افغان لوبډله د پاکستان ۱۹ کلنو پر وړاندې په یوه نږدې او ساهاخیستونکي سیالۍ کې یوازې د یو وېکټ په توپیر ماته وخوړه.
د پاکستان لوبډله اوس مهال د جدول په سر کې ده، چې له دوو لوبو یې درې امتیازونه ترلاسه کړي؛ یو یې د افغانستان پر وړاندې بریا او بل له زېمبابوې سره مساوي لوبه ده. زېمبابوې بیا له دوو مساوي لوبو دوه امتیازونه لري او دویم ځای لري، خو افغانستان یوازې یو امتیاز لري او د جدول په درېیم مقام کې ځای لري.
افغانستان چې لا هم دوه نورې لوبې د زېمبابوې او پاکستان پر وړاندې لري، د دې لپاره چې د اتلولۍ هیله یې ژوندۍ پاتې شي، سبا باید له زېمبابوې لوبه وګټي. افغان لوبډله که چېرې دا لوبه وبایلي یا مساوي شي، نو د دې سیالیو د اتلولۍ چانس به له لاسه ورکړي.
دا په داسې حال کې ده، چې د ۱۹ کلنو لوبډلو درېاړخیزې د کرېکټ سیالۍ د افغانستان، زېمبابوې او پاکستان د لوبډلو ترمنځ ترسره کېږي او د افغانستان ۱۹ کلنه لوبډله د نړۍوالو سیالیو د چمتووالي د پروګرام په چوکاټ کې په دغو سیالیو کې برخه اخلي.
