د افغانستان د کرېکټ بورډ د کورني کرېکټ د کلني پلان لهمخې، د "وزیر محمد اکبر خان" په نوم د فرسټ کلاس ولایتي یو ورځنیو سیالیو اوولسم پړاو به د مرغومي په ۱۶مه پیل شي. دغه سیالۍ به د همدې میاشتې تر ۲۶مې نېټې پورې په خوست او ننګرهار ولایتونو کې دوام وکړي.
په دې سیالیو کې ۱۲ لوبډلې برخه لري، چې په دوو ګروپونو وېشل شوي دي. د ۲۲ ورځو په ترڅ کې به ټولټال ۳۳ لوبې تر سره شي. په لومړي ګروپ کې د ننګرهار، لوګر، کابل الف، خوست ب او د کورني کرېکټ دویمه لوبډله او چیرمن ١١ لوبډلې شاملې دي، چې د دې ګروپ ټولې سیالۍ به د ننګرهار ولایت د نجیبالله ترهکي په کرېکټ لوبغالي کې ترسره شي.په دویم ګروپ کې د کورني کرېکټ لومړۍ لوبډله، اېسيبي١١، ننګرهار ب، کندهار الف، پکتیکا او خوست لوبډلې شاملې دي. د دې ګروپ سیالۍ به د خوست ولایت د رحمتولي مسرور په کرېکټ لوبغالي کې ترسره شي.د دې سیالیو د جدول لهمخې، هره لوبډله به په خپل ګروپ کې له ټولو نورو لوبډلو سره یوه-یوه لوبه ترسره کړي او پنځه سیالۍ به وکړي. د ګروپي پړاو له پای ته رسېدو وروسته، د هر ګروپ دوه غوره لوبډلې به نیمه پایلوبې ته لاره پیدا کړي.دا په داسې حال کې ده، چې د کابل الف، ننګرهار، ننګرهار ب، لوګر، خوست، خوست ب، پکتیکا او کندهار الف لوبډلو د دویم درجه ولایتي سیالیو له لارې د ۲۰۲۶ کال د لومړي درجه سیالیو ګډون جواز ترلاسه کړی دی. همداراز، څلور نورې لوبډلې چیرمن ١١، اېسيبي١١، د کورني کرېکټ لومړۍ او دویمه لوبډله د هغو ځوانو استعداد لرونکو لوبغاړو لپاره ور اضافه شوې دي، چې که څه هم په دویمه درجه سیالیو کې ښه ځلیدلي، خو د هغوی لوبډلې بل پړاو ته نه وې بریالۍ شوې.همداراز د افغانستان کرېکټ بورډ د لوبغاړو د غوراوي کمېټې د کورني کرېکټ له قراردادي لوبغاړو او همدارنګه د لیستاې او فرسټ کلاس سیالیو له ځینو مخکښو لوبغاړو څخه څو تنه غوره کړي، څو په دغو سیالیو کې د ځوانو لوبغاړو ترڅنګ ولوبېږي او خپلې تجربې ورسره شریکې کړي.د یادونې وړ ده، چې د ایسيبي ١١ لوبډله د ۲۰۲۵ کال د ولایتي لومړۍ درجې سیالیو اتله وه او په دې پړاو کې به د خپلې اتلولۍ دفاع هم وکړي. دغه سیالۍ د افغانستان د کرېکټ د نوي فصل دویم کورنی ټورنمنټ ګڼل کېږي او تر دې وروسته به نورې کورنۍ سیالۍ هم ترسره شي.
۳۰ کلن ظفر محسن تر دې دمه په ۱۷ مسلکي سیالیو کې برخه اخیستې ده، چې ۱۳ یې ګټلې او ۴ نورې یې بایللې دي. د هغه وروستۍ لوبه په PFL سازمان کې د ۲۰۲۴کال (د اکتوبر په ۱۹مه) وه.
دغه افغان لوبغاړي په خپلو ټولو بریاوو کې ۶ ځلې یې خپل سیالان ناک اوټ کړي، چې د هغه د بریاوو ۴۶ سلنه برخه جوړوي. دارنګه د «سبمېشن» تخنیک د محسن دویمه ځانګړنه ده، چې پر مټ یې تر دې دمه پنځه بریاوې ترلاسه کړې دي.
له بلې خوا د سویډن سامویل بارک په ۱۵ مسلکي لوبو کې ۱۳ بریاوې او ۲ ماتې لري. دغه سویډني لوبغاړي د خپلو ټولو بریاوو له ډلې ۶ ځله یې خپل سیالان ناک اوټ کړي او د قاضیانو د پرېکړې له مخې یې ۶ نورې بریاوې هم ترلاسه کړې دي. د هغه ۴۶سلنه بریاوې د ناک اوټ او قاضیانو د پرېکړې په کټګوریو کې دي.
