د اسراییل لومړي وزیر د ایران روانو اعتراضونو ته په اشارې سره ویلي، که په ایران کې بدلون راځي، نو هغه به له دننه وي. بنیامین نتنیاهن ټینګار کړی، دا بدلون به د ایران د خلکو په پرېکړه پورې تړلی وي او زیاته یې کړه: «موږ درک کوو چې هغوی له څه تېرېږي او له هغوی سره ژوره خواخوږي لرو.»
نتنیاهو له نیوزمکس سره په مرکه کې د ایران روان اعتراضونه د اسلامي جمهوري حاکمیت د کړنو او خراب اقتصادي وضعیت غبرګون وباله او ویې ویل، دا حالت د «خلکو د ځپلو او د وسلهوالو پروګرامونو ته د لومړیتوب ورکولو» له امله رامنځته شوی دی.
هغه وویل، چې د ایران حکومت «یو بااستعداده ملت چې ستر تاریخ لري» ځپلی دی او هغه راتلونکی یې لهمنځه وړی چې کولای یې شوای دغه هېواد ته رامنځته شي، خو دا هر څه یې «د ملایانو او حاکم ایتالله» په واک کې ورکړي. نتنیاهو زیاته کړه، د ایران مالي سرچینې د خلکو د ژوند د ښهوالي پر ځای د اټومي پروګرامونو او نیابتي ډلو د ملاتړ لپاره لګول شوي دي.
د اسراییل لومړي وزیر د ایران د پالیسیو اقتصادي پایلو ته په اشارې وویل، د دغو سیاستونو له امله د ایران خلک له بنسټیزو کمښتونو لکه خوړو، برېښنا او اوبو سره مخ دي. هغه ټینګار وکړ، چې ایران کولای شوای د نړۍ له بډایه هېوادونو څخه وي، خو اوسنی ناخالص کورنی تولید یې د داسې یوه هېواد نه هم کم دی چې شاوخوا ۱۰ میلیونه وګړي لري.
