د افغانستان لپاره د پاکستان پخواني ځانګړي استازي اصف دراني ویلي چې افغانستان له ګڼو ستونزو سره مخ هېواد دی او دده په وینا، پرېښودل یې داسې دي« لکه یو ناروغ چې د روغتون د جدي څارنې په څانګه (اې سيیو) کې یوازې پرېښودل شي».
هغه پر ایکس پاکستان د افغانستان «مشر ورور» بللی او وړاندیز یې کړی چې اسلاماباد باید د پراخ زړه، مهربانۍ او مثبت چلند له لارې د افغانانو ذهن او باور خپل کړي.
اصف دراني لیکلي چې پاکستان باید د دواړو ملتونو، افغانانو او پاکستانیانو، په اړه له منفي او مخالفو لیدلوریو تېر شي او د واقعبینانه سیاست له مخې عمل وکړي.
نوموړي ټینګار کړی چې که څه هم په سیمه کې د سولې ټینګښت ښايي اسانه نه وي، خو د هوښیارې او حساب شوې سیاستګرۍ له لارې د سولهییز ګډ ژوند زمینه برابرېدلی شي.
هغه پرته له دې چې د کوم هېواد نوم واخلي، ویلي که د سیمې «دښمنان» خپلې څو لسیزې زړې تګلارې پرېږدي او مخ پر وړاندې حرکت وکړي، نو د سیمې سترې ستونزې حل کېدای شي.
د پاکستان دغه پخواني استازي زیاته کړې، که څه هم په عمل کې د سولې ترلاسه کول ستونزمن ښکاري، خو په یوه ګډ کور له دوو ویجاړوونکو نړیوالو جګړو وروسته د اروپا بدلېدو دا ثابته کړه چې ناممکن ممکن کېدای شي. هغه خبرداری ورکړی چې د جنوبي اسیا هېوادونه باید د اور د تودوخې د ازمېښت لپاره خپلې ګوتې ونه سوځوي.
اصف درانی دغه څرګندونې په داسې حال کې کوي چې له څو میاشتو ترینګلتیا وروسته، په دې وروستیو کې د پاکستاني چارواکو او طالبانو ترمنځ د اړیکو د ښهوالي نښې ښکاره شوې دي.
