په داسې حال کې، چې طالبان د لمریز او میلادي تقویم پرځای سپوږمیز تقویم کاروي، د دې ډلې ویاند ذبیح الله مجاهد د روان میلادي کال په وروستۍ ورځ د طالبانو د بیلابیلو ادارو د تیر یوه کال رپوټ وړاندې کړی.
مجاهد د خپلې ډلې د لاسته راوړنو د تشریح په ترڅ کې ویلي، چې د ټاپي پروژې په چوکاټ کې تر اوسه په افغانستان کې ۱۶ کیلومتره پایپ غځول شوی او د پاتې ۸۷ کیلومتره د نصب زمینه برابره شوې، چې د پایپونو له رسېدو سره به هره ورځ یو کیلومتر پایپ نصب شي.
مجاهد زیاته کړې، چې د کانونو په سکتور کې له تېرو ۱۲ میاشتو راهیسې د لسګونو کانونو د مسلکي استخراج او پروسس چارې پیل شوې او د نورو کانونو جیو فزیکي مطالعات بشپړ شوي چې د عملي کارونو پیل ته چمتو دي.
د طالبانو د ویاند وینا، د برېښنا په سکتور کې هم پرمختګ شوی او د تېرو ۱۲ میاشتو په ترڅ کې د لسګونو مېګاواټو لمریزې برېښنا تولید پیل شوی، د عزیزي انرژۍ ګروپ سره د لس زره مېګاواټو د برېښنا تولید قرارداد لاسلیک شوی او له ګڼو کورنیو او بهرنیو شرکتونو سره د برېښنا تولید په بېلابېلو برخو کې قراردادونه شوي دي.
مجاهد په خپل رپوټ کې وايي، چې د ترانسپورټ په سکتور کې د لویو لارو د بیارغونې چارې روانې دي، چې د کابل-غزني دویم لین سړک، د سالنګونو پاتې برخه، واخان دهلېز، کابل-ننګرهار دویم لین سړک، کابل-لوګر دویم لین سړک او د لومړۍ درجې ولایتونو د لسګونو سړکونو بیارغول پکې شامل دي.
همدارنګه د طالبانو ویاند ویلي چې د دویمې درجې ولایتونو سړکونه او د ولسوالیو ترمنځ لارې او د رېل پټلۍ له لارې د سیمې او ګاونډیو هېوادونو سره د افغانستان د نښلولو چارې هم روانې دي.
د ښاروالیو د پرمختګ په برخه کې نوموړي ویلي، چې کابل ښاروالۍ په تېرو ۱۲ میاشتو کې د ټول ښار لپاره ۳۷۵ پروژې پلان کړې وې، چې تر اوسه یې ۱۷۰ پروژې بشپړې شوې او ۲۰۵ نورې پروژې روانې دي.
کابل ښاروالۍ پرون د یوه هوايي پله د جوړولو چارې په رسمي ډول پیل کړې.
دغه راز د صنعت سکتور کې مجاهد ویلي، چې افغانستان اوس مهال د کرنیزو محصولاتو، درملو، خوراکي توکو، لاسي صنایعو او نورو ۲۴ برخو تولیدات لري او د پانګونې لپاره مناسب فرصتونه برابري شوي دي، چې کورني او بهرني پانګوال کولای شي په بېلابېلو صنایعو لکه کیمیاوي، ساختماني، د ماشین جوړونې، فلزاتو، درملو، چاپ، ترکاڼي، کاغذ، سپکو او خوراکي موادو کې پانګونه وکړي.
د سیمهییز اتصال په برخه کې ذبیح الله مجاهد وايي، چې افغانستان د منځنۍ او سویلي اسیا ترمنځ د ترانزیت او د انرژۍ د لیږد لپاره نږدې او امنه لار بلل شوې او طالبانو د ټاپي، کاسا زر، افغان ټرانس، ټوټاپ او ټاپ پروژو د عملي تطبیق لپاره زمینه برابره کړې ده.
د طالبانو ویاند وايي، چې د دې ډلې د ملي تدارکاتو کمیسیون په ۳۳ غونډو کې ۵۶۲ بېلابېلې پروژې د شاوخوا ۱۳۰،۶ میلیارده افغانیو په ارزښت منظورې کړي، چې دا ګام د هېواد د اقتصادي ودې، پراختیا او ځان بساینې لپاره مهم ګڼل کېږي.
