په کابل کې د ملګرو ملتونو د استازځي مرستیال اندریکا راتوته وايي، چې د یاد سازمان اړوندو ادارو د افغان کډوالو او راستنېدونکو پر ځای پرځای کولو او د ستونزو حل په برخه کې سږکال دوه نیم میلیارده ډالر لګولي دي.
د طالبانو د کډوالو او راستنېدونکو چارو وزیر مولوي عبدالکبیر د چارشنبې په ورځ، د مرغومي پر ۱۰مه، د بشري مرستو د همغږۍ په برخه کې د یوناما له مرستیال اندریکا راتوته سره د افغان کډوالو او راستنېدونکو د ستونزو د حل او د مرستو رسولو بهیر په اړه خبرې کړې دي.
په دې ناسته کې اندریکا راتوته ویلي، چې د روان میلادي کال په ترڅ کې د ملګرو ملتونو اړوندو ادارو د افغان کډوالو د ستونزو د حل لپاره شاوخوا دوه نیم میلیارده امریکايي ډالر لګولي دي.
د هغه په وینا، دغه لګښتونه له افغانانو سره د ملګرو ملتونو د دوامدارې ژمنتیا څرګندونه کوي.
د یوناما مرستیال ټینګار کړی، چې د طالبانو له ادارو سره همغږي اړینه ده او زیاته کړې یې ده، چې د راتلونکي کال لپاره د کډوالو د اړتیاوو د کره تشخیص په موخه به له کډوالو چارو وزارت سره ګډ کار ته دوام ورکړي.
مولوي عبدالکبیر ویلي، چې د طالبانو ادارې د روان ژمي لپاره له راستنو شویو افغانانو سره د بېړنیو مرستو ځانګړی پلان جوړ کړی دی، چې د هېواد په کچه به پلی شي. د هغه په وینا، په هر ولایت کې به لږ تر لږه له زر کورنیو سره د خوراکي توکو ترڅنګ نغدي مرسته هم وشي.
د ناستې پر مهال د طالبانو د کډوالو چارو وزارت ویلي، چې د خیرغوښتونکو خلکو په همکارۍ یې د راستنو شویو لپاره د مرستو لړۍ پیل کړې ده او تمه یې ښودلې، چې زرګونو کورنیو ته به اړین خوراکي مواد ورسېږي.
