د زلمي خلیلزاد او امیرخان متقي له لیدنې وروسته د امریکا د بهرنیو چارو وزارت د چهارشنبې په ورځ افغانستان انټرنشنل ته ویلي، چې خلیلزاد د امریکا د حکومت کارکوونکی نه دی او نه هم د دې هېواد استازیتوب کوي. دغه وزارت کابل ته د امریکا د پخواني استازي سفرونه «شخصي» بللي دي.
د طالبانو د بهرنیو چارو وزارت د یکشنبې په ورځ (د مرغومي ۷مه) کابل ته د امریکا د پخواني استازي زلمي خلیلزاد د سفر خبر ورکړ او زیاته یې کړه ، چې نوموړي د طالبانو د بهرنیو چارو له وزیر امیرخان متقي سره کتلي دي.متقي وویل، له افغانستان څخه د بهرنیو ځواکونو تر وتلو او د جګړې تر پای ته رسېدو وروسته، د طالبانو او امریکا ترمنځ تعامل عملاً نوي پړاو ته داخل شوی دی.د بهرنیو چارو د وزیر په کچه له خلیلزاد څخه د طالبانو هر کلی ددې ښکارندویي کوي، چې دغه ډله له واشنګټن سره د اړیکو د ښهوالي لپاره د هغه پر اړیکو او مهارتونو حساب کوي.خو د امریکا د بهرنیو چارو وزارت د طالبانو او د افغانستان د سیاسي وضعیت د څارونکو پر اټکلونو د پای ټکی کېښود.دغه وزارت د افغانستان انټرنشنل خبریال تاجالدین سروش ته ویلي: «زلمی خلیلزاد د امریکا د حکومت کارکوونکی نهدی، له همدې امله د دغه هېواد استازولي نه کوي.»د دې وزارت د ځواب په دوام کې ویل شوي: «ټول هغه فعالیتونه چې نوموړی یې ترسره کوي، شخصي بڼه لري.»دا په داسې حال کې ده، چې تر دې وړاندې زلمی خلیلزاد د طالبانو لهخوا د امریکایي بندیانو د خوشې کېدو په موخه له امریکایي چارواکو سره یوځای افغانستان ته سفر کړی و.د طالبانو د بهرنیو چارو وزیر خلیلزاد ته ویلي و، چې په ډېرو برخو کې د دواړو هېوادونو ترمنځ د اړیکو د پراخولو فرصتونه شته، چې د دوامدارو خبرو اترو له لارې پرې کار کېدای شي.
