په ایران کې له روانو لاریونونو سره هممهاله، اروپايي اتحادیې د بشري حقونو د مدافعانو نیول او د هغوی د بند دوام په کلکه غندلي دي او ویلي یې دي، چې دا وضعیت له ژورې اندېښنې سره تعقیبوي.
د اروپايي اتحادیې په وینا، د بشري حقونو د فعالانو نیول په ځانګړي ډول د ډسمبر په ۱۲مه په مشهد کې د یو شمېر فعالانو نیول او همداراز پر نرګس محمدي دوامداره بندیزونه یا محدودیتونه د بشر حقونو په برخه کې د ایران له نړۍوالو ژمنو سره په ټکر کې دي.
په دې اعلامیه کې ټینګار شوی، چې د بشري حقونو مدافعین باید د وېرې، ګواښ، نیول کېدو یا د قضايي تعقیب له اندېښنې پرته د خپلو بنسټیزو حقونو لکه د بیان ازادۍ، سولهییزو غونډو او د سازمان جوړونې حق څخه برخمن وي.
اروپایي اتحادیې له ایراني چارواکو غوښتي، هغه کسان چې یوازې د سولهییزو فعالیتونو له امله نیول شوي، له ځنډ پرته خوشې کړي او د نړۍوالو بشري حقونو د قوانینو پر بنسټ خپلو ژمنو ته وفادار پاتې شي.
