مصر، قطر او ترکیې د لبنان حزبالله ته په یوه پیغام کې خبرداری ورکړی، چې د بېوسلې کېدو او د لبنان دولت ته د خپلو پوځي تجهیزاتو د سپارلو له غوښتنې سره موافقه وکړي.
الشرقالاوسط ورځپاڼې د لبنان د دولتي سرچینو له قوله راپور ورکړی، چې د چهارشنبې په ورځ (د مرغومي ۱۰مه) دغو درېیو هېوادونو چې په وروستیو میاشتو کې د لبنان د وضعیت په اړه د منځګړیتوب په هڅو کې فعاله ونډه لرله، په خپل پیغام کې ټینګار کړی چې د اوسني وضعیت دوام له اسراییل سره د پوځي تاوتریخوالي د لا زیاتېدو ګواښ لوړوي او د دې ډلې او د لبنان د ټولنې ترمنځ واټن لا ژوروي.د دغو سرچینو په وینا، د مصر، قطر او ترکیې پیغام د وسلو د سپارلو او د یوې نوې شخړې د مخنیوي لپاره «وروستی فرصت» بلل شوی دی.منځګړو هېوادونو د حزبالله چارواکو ته ویلي، چې بېوسلې کېدل کولای شي لبنان له داسې برید څخه وژغوري، چې د دوی په وینا به د دغه هېواد د کورني ثبات لپاره پراخې پایلې ولري.دوی خبرداری ورکړ، چې هر ډول نوې شخړه به د حزبالله او د لبنان د ټولنې د ځینو برخو ترمنځ واټن لا زیات کړي.پر حزبالله د برید په تړاو اسراییل ته د ټرمپ زرغون څراغد خبرداري دا پیغام داسې وخت حزبالله ته ورکړل شوی، چې د امریکا ولسمشر ډونالډ ټرمپ د اسراییل له لومړي وزیر بنیامین نتنیاهو سره په لیدنه کې بیا «د حزبالله پر بشپړ بېوسلې کېدو» ټینګار وکړ.له واشنګټن پوسټ ورځپاڼې سره په خبرو کې یوې باخبره سرچینې ویلي، ټرمپ اعلان کړی چې که د لبنان پوځ د حزبالله د بېوسلې کولو په برخه کې ناکام شي او که اسراییل د پوځي اقدام اړتیا احساس کړي، واشنګټن به د تل ابیب له پرېکړې ملاتړ وکړي.
