د ملګرو ملتونو د کډوالو عالي کمېشنري وایي، چې اتریش د راستنېدونکو افغان کډوالو د لاسنیوي په موخه یو میلیون امریکايي ډالر مرسته کړې ده. یاده اداره زیاتوي چې په دې مالي مرستې سره به افغان راستنېدونکو ته د بیا مېشتېدنې لپاره اړینې مرستې چمتو کړي.
د ملګرو ملتونو د عالي کمېشنرۍ په وینا، د اتریش دا سخاوتمندانه مرسته به سږ کال د دې ادارې د ساتنې او خوندیتوب خدمتونه پیاوړي کړي، څو کورنۍ وکولای شي په خوندي ډول او له انساني کرامت سره سم خپلو سیمو ته ستنې شي.
ملګري ملتونه وایي، د یادو مرستو له لارې به راستنېدونکو کورنیو ته د سرپناه، بنسټیزو اړتیاوو، حقوقي ملاتړ او ټولنیزو خدمتونو د برابرولو په برخو کې اسانتیاوې رامنځته شي، چې له بېوزلۍ، ناامنۍ او بیا ځلي بېځایه کېدو څخه خوندي پاتې شي.
د ملګرو ملتونو د کډوالو عالي کمېشنري ټینګار کوي، چې د نړیوالو شریکانو دوامدار ملاتړ د افغانستان د بشري وضعیت د ښه والي لپاره حیاتي دی او دا ډول مرستې د زرګونو افغان کورنیو د خوندي او باعزته راستنېدنې زمینه برابروي.
