د افغانستان په بازارونو کې د خوراکي توکو بیې ۴،۲ سلنه لوړې شوې دي. د غلو دانو په بیو کې ۳،۵ سلنه، د غوړیو په بیو کې ۱۳،۹، د غیرخوراکي موادو بیې ۱،۹، د پوښاک ۳،۱ او د درملنې لګښتونه ۱۷،۲ سلنه لوړ شوي. دغه راز د مصرفي توکو د بیو د شاخص میاشتنی انفلاسیون ۲،۸ سلنه لوړ شوی.
د طالبانو د احصایې ادارې د پنجشنبې په ورځ، د مرغومي پر ۱۱مه، اعلان وکړ، چې په لیندۍ میاشت کې د غلو دانو په بیو کې ۳،۵ سلنه، د غوړو په بیو کې ۱۳،۹ سلنه او د بېلابېلو سبزیو په بیو کې ۲۹ سلنه زیاتوالی راغلی دی.
د طالبانو داحصایې او معلوماتو ادارې ویلي چې د غیرخوراکي توکو بیې هم لوړې شوې دي.
د دې ادارې په وینا، د غیرخوراکي موادو بیې ۱،۹ سلنه، د جامو او پوښاک بیې ۳،۱ سلنه او د درملنې لګښتونه ۱۷،۲ سلنه زیات شوي دي.
د طالبانو تر کنټرول لاندې دې ادارې ویلي چې د روان کال لېندۍ په میاشت کې د مصرفي توکو د بیو د شاخص میاشتنی انفلاسیون ۲،۸ سلنه لوړ شوی، چې لامل یې د خوراکي او غیرخوراکي توکو د بیو زیاتوالی دی.
همدارنګه، د دې ادارې د معلوماتو له مخې، د ۱۴۰۴ لمریز کال لېندۍ د میاشتې نقطه پر نقطه انفلاسیون د تېر کال د همدې میاشتې په پرتله ۸،۶ سلنه زیاتوالی ښيي.
دا په داسې حال کې ده چې له پاکستان سره د افغانستان سوداګریزي لارې له دریو میاشتو راهیسې د هر ډول سوداګرۍ پر مخ تړلې پاتې دي. اقتصادي کارپوهان باور لري چې د دغو لارو بندېدل د وارداتي توکو د بیو د لوړېدو له مهمو لاملونو څخه دي.
تر دې وړاندې، د سوداګرۍ او پانګونې خونې ویلي و چې د افغان سوداګرو وارداتي توکي له شپږو تر شپږ نيمو میلیارده ډالرو په ارزښت د پاکستان په بندرونو کې بند پاتې دي، چې دې چارې د هېواد پر بازارونو مستقیم اغېز کړی دی.
