په داسې حال کې، چې په کوردننه طالبانو د بین الافغاني خبرو اترو مخه ډب کړې، د دې ډلې د بهرنیو چارو وزارت د یمن ښکیلې خواوې تفاهم او خبرو اترو هڅولې. یاد وزارت په یوه اعلامیه کې ویلي، چې د یمن د ملي یووالي، ځمکنۍ بشپړتیا او ثبات لپاره د ښکېلو لوریو هڅې ستايي او ارزښتناکې یې بولي.
طالبانو د پنجشنبې په ورځ، د مرغومي پر ۱۱مه په یوه اعلامیه کې وویل، چې په یمن کې وروستي سیاسي او امنیتي بدلونونه له نږدې څاري.
په اعلامیه کې ویل شوي چې د طالبانو د بهرنیو چارو وزارت له ټولو اړخونو غواړي له هغو کړنو ډډه وکړي چې د یمن یووالي، ثبات او د سیمې امنیت ته زیان رسوي.
همداراز یاد وزارت هیله څرګنده کړې چې ټول ښکېل اړخونه، په ځانګړي ډول یمني لوري، د ستونزې د حل لپاره تفاهم او خبرو اترو ته لومړیتوب ورکړي، څو په یمن کې د بېثباتۍ د لا زیاتېدو مخه ونیول شي.
د طالبانو د بهرنیو چارو وزارت ټینګار کړی چې د روان بحران د حل لپاره سیاسي تفاهم او سولهییزې خبرې تر ټولو اغیزناکه لاره ده.
طالبان داسې مهال د یمن په اړه دغه اعلامیه ور کوي، چې په کوردننه او بهر دغه ډله له ګڼو مخالفتونو سره مخ ده او د دوحې د پرېکړې له مخې هم دې ته نه ده چمتو شوې، چې د بین الافغاني خبرو اترو له لارې له ښکیلو لوریو سره خبرو اترو ته کښیني.
