سویسي چارواکي وايي، د سویس د کرانس–مونتانا د سکي په تفریحي سیمه کې د یوه رسټورانت دننه د اورلګېدنې له امله شاوخوا ۴۰ کسان مړه او لږترلږه ۱۱۵ نور ټپیان شوي چې د ځینو روغتیایي حالت نازک ښودل شوی دی.
د یادې پېښې ګڼ قربانیان ځوانان وو، چې د نوي زېږدیز کال د نمانځنې لپاره سره راټول شوي وو. د یاد ښار د ښاروال نیکولا فېرو په وینا؛ د جسدونو پېژندنه ښايي څو ورځې وخت ونیسي.
چارواکي وايي، لاتر اوسه د اورلګېدنې اصلي لامل نهدی روښانه شوی. ځینې ژوندي پاتې شوي کسان وايي، ښايي اور هغه مهال بل شوی وي چې د چت سره نږدې ډېوې بلې شوې وې.
د سویس پولیس وايي، د ټولو قربانیانو تر بشپړې پېژندنې پورې به یې څېړنې روانې وي.
د برېتانیا د اصلاحاتو ګوند مشر نایجل فراج په ایران کې د لایونونو په ملاتړ ویلي:«د ایران ظالم رژیم باید لهمنځه لاړ شي.»
د برېتانیا د اصلاحاتو ګوند مشر نایجل فراج په ایران کې د لاریون کوونکو څخه خپل ملاتړ څرګند کړی او پر خپله اېکسپاڼه یې لیکلي:«زه د ایران د ازادۍ هڅوونکو ته د نېکمرغۍ او کامیابۍ هیله لرم، لکه څنګه چې له کلونو راهیسې دا هیله لرم. دا ظالم رژیم باید لهمنځه لاړ شي.»
پر همدغه مهال شهزاده رضا پهلوي د نوموړي له ملاتړ نه مننه کړې ده او وايي، چې د مبارزې له بریا وروسته به ایران او برېتانیا یو ځل بیا ښې اړیکې ولري.
دغه برېتانوي سیاستوال څه موده وړاندې هم پر خپل انسټاګرام له شهزاده رضا پهلوي سره د خپلې لېدنې د انځور په خپرولو سره لیکلي وو: «د برېتانیا لومړی وزیر کېیر سټامر به کله د ایران د مشر پر وړاندې ودرېږي او سپاه پاسداران به تحریم کړي».
دا په داسې حال کې ده، چې پنځه ورځې وړاندې د ایران په ګڼو ولایتونو کې پراخ لاریونونه پیل شول او لاهم دوام لري. په یادو لاریونونو کې معترضین د اسلامي جمهوریت، علي خامنهیی او سپاه پاسداران پر ضد شعارونه ورکوي. دغه راز معترضین د شهزاده رضا پهلوي او رضاشاه پهلوي په ملاتړ شعارونه هم پورته کوي.
د راپورونو لهمخې، تر دې مهاله په یادو لاریونونو کې لږ تر لږه ۱۱۹ کسان نیول شوي او اووه نور وژل شوي دي.
د اسراییل پوځ په خپل کلني راپور کې ویلي، چې د ۲۰۲۵ کال په اوږدو کې یې د زرګونو هوايي، ځمکنيو او سمندري بریدونو له لارې د حماس، حزبالله، حوثیانو او د ایران د پوځي نظام لسګونه لوړپوړي قومندانان او چارواکي په نښه کړي دي.
په دغه راپور کې چې د چهارشنبې په ورځ (د مرغومي ۱۰مه) خپور شوی راغلي، چې د اسراییل پوځ د ډسمبر میاشتي تر نیمايي پورې په بېلابېلو برخو کې نږدې ۲۰ زره او ۹۰۰ هدفونه په نښه کړي او شاوخوا ۴۳۰ ځمکني عملیات یې تر سره کړي او ۵۰ سمندري بریدونه یې کړي.
پر غزې او لبنان تمرکز
د اسراییل د پوځ سوېلي قومندانۍ اعلان کړی، چې د غزې په تړانګه کې د خپلو عملیاتو پر مهال شاوخوا ۱۹ زره او ۵۳۰ هدفونه یې په نښه کړي او د حماس اړوند ۱۳ زره او ۹۱۰ بنسټونه یې لهمنځه وړي دي.
په دغو عملیاتو کې د وژل شویو کسانو په منځ کې محمد سنوار هم شامل و، چې د حماس د پوځي څانګې یو لوړپوړی قوماندان او د اکټوبر د ۷مې د برید یو پلان جوړونکی وو.
همدارنګه د حماس د لوا، کنډک او تولګي په کچه قومندانان هم د وژل شویو کسانو په لېست کې شامل دي.
په شمالي جبهه کې د اسراییل پوځ خبر ورکړی، چې د حزبالله نږدې ۹۵۰ مرکزونه او سنګرونه یې په نښه کړي دي. د دغو بریدونو په پایله کې شاوخوا ۳۸۰ د حزبالله جنګیالي وژل شوي او د دې ډلې یو شمېر لوړپوړي قومندانان، د ټانک ضد او لوژستیکي واحدونو مسوولین وژل شوي دي.
همدارنګه د اسراییل د پوځ مرکزي قومندانۍ اعلان کړی، چې شاوخوا ۲۳۰ کسان وژل شوي او له ۷۴۰۰ څخه زیات کسان نیول شوي دي.
ایران او یمن؛ د جګړې د لمنې پراخېدل
د دې راپور په بله برخه کې راغلي، چې د اسراییل پوځ د طلوع شیران په نوم د عملیاتو په لړ کې شاوخوا ۱۵۰۰ هغه هدفونه تر برید لاندې نیولي چې له ایرا ن سره یې تړاو درلود. د پوځ په وینا، په دغو عملیاتو کې ۱۱ اټومي ساینسپوهان او ۳۰ لوړپوړي پوځي چارواکي وژل شوي دي، چې په هغوی کې د وسلهوالو ځواکونو د لوی درستیز محمد حسین باقري او د سپاه پاسداران عمومي قومندان حسین سلامي هم شامل وو.
په یمن کې هم د اسراییل هوايي ځواک د شاوخوا ۱۸۰ جنګي الوتکو په ګډون له ۲۳۰ څخه زیات د حوثیانو هدفونه بمبار کړي دي. د اسراییل پوځ ویلي، چې د دغو بریدونو پر مهال د حوثیانو لومړی وزیر، څو وزیران او یو لوړپوړی پوځي قومندان وژل شوي دي.
په همدې لړ کې، د اسراییل پوځ د لیندۍ په میاشت کې اعلان وکړ چې له امریکا سره یې د دواړو هېوادونو د پوځي همکاریو په چوکاټ کې ګډ سمندري پوځي تمرین ترسره کړی، چې موخه یې په سمندري برخه کې د عملیاتي همغږۍ پیاوړتیا وه.
دغه تمرین د تلابیب او واشنګټن ترمنځ د نږدې امنیتي همکاریو د دوام ښکارندوی دی.
د دې راپور لهمخې، په ۲۰۲۵ کال کې له ۳۰۶ زرو څخه زیات احتیاطي ځواکونه جلب شوي دي او لسګونه زره هغه کسان چې مخکې له پوځي خدمت څخه معاف شوي وو، بېرته خدمت ته وربلل شوي دي.
د اسراییل پوځ همدارنګه د زرګونو طبي تخلیو عملیاتو، د لسګونو زرو سرتېرو د روزنې او په بېلابېلو سیمو کې د سلګونو پناه ځایونو او د خطر زنګونو د نصبولو خبر ورکړی دی.
په دې راپور کې دا هم ویل شوي چې ۸۲۱ اسراییلي سرتېري وژل شوي او ۹۱ نور ټپیان شوي دي.
د وروستیو معلوماتو لهمخې، د پاکستان د انفلاسیون کچه په ډسمبر میاشت کې ۵،۶ سلنې ته راټیټه شوې، د انفلاسیون یاده کچه په نوامبر میاشت کې ۶،۱ سلنه وه.
د پاکستان اقتصاد په ۲۰۲۳ کال کې د ۳۰ سلنې پړسوب په پام کې نیولو سره ښه فعالیت ښودلی دی.
د پاکستان د احصايي ادارې ویلي، چې په ډسمیر میاشت کې د خوړو بیې په ځانګړي ډول مېوو او سبزیو بیې راټیټې شوې، چې له امله یې د انفلاسیون پر کچې هم اغېز کړی دی.
د راپور لهمخې، په ډسمبر میاشت کې د خوراکي توکو بیې په منځني ډول ۱،۷ سلنه راټیټې شوې او دا تمایل په ښاري او کلیوالي دواړو سیمو کې لېدل شوي دي.
دا ارقام وروسته له هغه خپرېږي، چې د پاکستان مرکزي بانک تېره میاشت په ناڅاپي ډول د بنسټیزې سود کچه ۵۰ واحده راټیټه کړه او ۱۰،۵ سلنې ته یې راورسوله. یاده پرېکړه د بازار د تمې خلاف وه، ځکه د هغه ټولو شنونکو وړاندوینې یې برعکس کړې، چې له رویټرز سره یې په خبرو کې ویلي وو، چې مرکزي بانک به سود کچه راکمه نه کړي.
د پاکستان د مالیې وزارت مخکې ویلي وو، چې تمه لري چې د ډسمبر د میاشتې د انفلاسیون کچه به د ۵،۵ تر ۶،۵ سلنې په شاوخوا کې وي.
په ورته مهال د پیسو نړۍوال صندوق خبرداری ورکړی، چې د سود او کچې ژر او بېوخته راکمول کېدای شي د پاکستان د ۷ میلیارده ډالرو د پور پروګرام د موخو لپاره خطرونه پیدا کړي.
د پاکستان د بهرنیو چارو وزارت ویاند ویلي، چې د ایران د اټومې پروګرام د مخنیوي لپاره د ګډو شریکانو له امله رامنځته شوې شخړې او پر ایران د اسراییل د بریدونو په اړه د پاکستان دریځ اصولي دی.
د پاکستان د بهرنیو چارو وزارت ویاند طاهر اندرابي د اوونیزې خبري کنفرانس پرمهال ویلي، چې د ایران اړوند مسایلو په اړه د یاد هېواد دریځ خورا اصولي دی.
نوموړي ویلي:«لومړۍ موضوع د ایران او د هغه د اټومې پروګرام د مخینوي شریکانو ترمنځ اټومي موضوع له امله رامنځته شوې شخړه ده. په دویم قدم کې د اسراییل لهخوا د ایران پر وړاندې ترسره شوي بریدونه دي او موږ په کلکه د ایران او د هغه د دفاع د حق ملاتړ کړی دی.»
د پاکستان د بهرنیو چارو وزارت ویاند یادې څرکندونې پر داسې مهال کړې، چې امریکا ته د نتیاهو له سفر وروسته د ایران ولسمشر پزشکیان ویلي و، چې ایران له امریکا، اسراییل او اروپا سره په جګړه کې دی.
د چین ولسمشر شي جینپینګ ویلي، هېڅوک نهشي کولی ټایوان له چین سره له یو ځای کېدو راوګرځوي او دا چاره به حتمي ترسره کېږي. نوموړي ټینګار کړی، چې د ټایوان تنګي دواړو غاړو ته مېشت چینایان له یو بل سره د وینې او خپلوۍ اړیکې لري.
شي جینپینګ دا څرګندونې د نوي میلادي کال په مناسبت په خپله وینا کې کړي او ویلي یې دي، چې د ټایوان بېرته له چین سره یو کېدل د وخت غوښتنه ده او هېڅ ځواک یې مخه نهشي نیولی.
د چین د ولسمشر دغه څرګندونې یوه ورځ وروسته له هغه شوې، چې چین ټایوان ته نږدې خپلې دوه ورځنۍ پوځي مانورې پای ته ورسولې. دا پوځي تمرینونه تر هغه څو ورځې وروسته ترسره شول، چې امریکا ټایوان ته د څه باندې ۱۱ میلیارده ډالرو په ارزښت د وسلو د پلور اجازه ورکړه.
د چین ولسمشر په خپل پیغام کې ویلي، چې چین تل د تاریخ په سمه لار ولاړ دی او د نړۍ د سولې، پرمختګ او د انسانیت د ګډ راتلونکي لپاره له ټولو هېوادونو سره د همکارۍ چمتووالی لري.
شي جینپینګ د ټایوان د بېرته ترلاسه کولو د ورځې د نمانځلو د اعلان هرکلی هم کړی، چې د هر کال د اکتوبر په ۲۵مه به د دویمې نړۍوالې جګړې پر مهال د جاپان له ولکې د ټایوان د ازادېدو د یاد په توګه نمانځل کېږي.
نوموړي همداراز د چین د مصنوعي ځیرکتیا او فضایي صنعت د پرمختګونو ستاینه کړې او ویلي یې دي، چې چین د چپسازۍ په څېړنه او پرمختګ کې مهمې لاسته راوړنې لري، چې دا هېواد یې د نړۍ له چټک پرمختګ کوونکو اقتصادونو څخه ګرځولی دی.