د پېښور محکمې هغه افغان ته د اوسېدو ۶میاشتې وخت ورکړی، چې له پاکستانۍ مېرمنې سره یې واده کړی. دا په داسې حال کې ده، چې له پاکستان نه د افغان کډوالو د اېستلو روان بهیر هغه افغانان هم اغېزمن کړي، چې له پاکستاني وګړو سره یې ودونه کړي دي.
په همدې تړاو تازه د پېښور په ستره محکمه کې د هغه جوړې د قضیې اورېدونه وشوه، چې له پاکستان نه د اېستلو له ګواښ سره مخ وو. دغه افغان ته چې شپږ میاشتې د اوسېدو وخت ورکړل شوی، له یوې پاکستانۍ مېرمنې سره یې واده کړی او له کلونو راهیسې په پاکستان کې مېشت دی.
محکمې اړوندو ادارو ته لارښوونه کړې، چې یادې جوړې ته د قانوني اسنادو د بشپړولو لپاره دې شپږ میاشتې وخت ورکړل شي. دې ته ورته د اسلاماباد په ګڼو لویو ښارونو کې د هغو کسانو لهخوا قضیې ثبت شوې، چې له پاکستاني وګړو سره یې ودونه کړي دي.
دغه کډوالو له هغه وروسته له محکمو د مرستې غوښتنه کړې، چې له دغه هېواده د افغان کډوالو د بېرته ستنونې روانې لړۍ له امله د اېستلو له ګواښ سره مخ دي.
