راپورونه وايي، حزبالله د لبنان په ختیځ کې د الهرمل په سیمه کې یو لوی استوګنیز کمپ د «شهیدانو د کورنیو لپاره د امام علي استوګنیز کمپ» په نوم جوړ کړی دی، چې د رسمي جواز پرته جوړ شوی او د دولتي ادارو تر څار لاندې نه دی.
دغه کمپ، چې له کانکریټو جوړ شوی، ۲۲۸ استوګنیز واحدونه لري او تر ۴۰ زرو ډېر خلک پکې اوسیږي. د سرچینو په وینا اکثر اوسېدونکي سوري کډوال دي.
د لبنان د پارلمان غړی او د «لبناني ځواکونو» ګوند استازې غاده ایوب دغه موضوع ولسي جرګې ته رسولې او ویلي یې دي چې کمپ «له قانوني پروسو بهر» جوړ شوی او داسې بڼه لري چې «امنیتي ماهیت» وربخښي او عملاً د دولت له واکه بهر پرېښودل شوی دی.
ایوب همداراز ویلي، دغه کمپ د دیوالونو په وسیله محاصره دی، یوازې یوه د ننوتلو دروازه لري او د ګوند اړوند بنسټونه یې کنټرول کوي.
رسنیز راپورونه د حزبالله د یوه سیمهییز مسوول له قوله زیاتوي چې کمپ د ایران په مالي ملاتړ جوړ شوی دی.
ایوب ټینګار کړی چې دا موضوع به تر پایه تعقیب کړي، ځکه د دولت له مشروع واک څخه بهر موازي امنیتي جوړښتونه د منلو نه دي.
له بلې خوا، دولتي سرچینې وايي لا تر اوسه رسمي پوښتنه نه ده ترلاسه شوې، خو قانون له مخې حکومت باید په ۱۵ ورځو کې ځواب ورکړي او که د قناعت وړ وي، موضوع ممکن تر استیضاح ورسېږي.
العربیه د خپلو سرچینو له قوله لیکي چې د ودانیزو جوازونو مسوولو ادارو ته د داسې کمپ لپاره هېڅ ډول رسمي غوښتنلیک نه دی ورسېدلی.
خو امنیتي سرچینې وایي، دا کمپ د نورو کډوال کمپونو په څېر دی، له سرحد څخه ۱۰ کیلومتره لرې دی، دولتي ادارې ورته لاسرسی لري او که هر کله مشکوک معلومات ترلاسه شي، قانوني اقدامات به وشي.
