ازادۍ جبهه وايي، طالبانو په بدخشان او تخار کې د کانونو پر را اېستنې د ځايي خلکو اعتراضونه ځپلي او پر معترضینو په برید سره یې یو شمېر معترضینو ته مرګژوبله اړولې ده.دغې جبهې طالبان د مقاومت جبهې د یوه غړي جسد ته پر سپکاوي تورن کړي او طالبانو ته سزا ورکړه یې خپله دیني وجیبه ګڼلې ده
سرچینې افغانستان انټرنشنل ته وايي، د تخار د چاهاب ولسوالۍ د سمتي سیمې اوسېدونکو د سرو زرو د کان د کېندنې پر سر په شخړو کې د طالبانو اړوند شرکتونو وسایلو ته اور اچولی دی. په دې نښتو کې درې لاریونوال او یو طالب وژل شوي او ۱۶ نور ټپيان دي.
سرچینو همدارنګه ویلي، چې خلک د چاپېریالي زیانونو او د شرکتونو د بې بریده کېندنو له امله د اوبو د بندېدو په اعتراض کې راوتلي دي.
ازادۍ جبهه وايي، په بدخشان کې هم ورته پېښه رامنځته شوې او هلته هم یو شمېر معترضینو ته مرګژوبله اوښتې، خو د کره شمېر په تړاو یې څه نهدي ویلي.
دغې جبهې د دوشنبې په ماخوستن (د مرغومي ۱۵مه) د یوې خبرپاڼې په خپرولو سره ویلي، د طالبانو له لوري د هېواد د شمالي ولایتونو د کاني سرچینو چور کول د ځايي خلکو له کلک غبرګون سره مخ شوي دي.
یادې جبهې طالبان د بغلان په نهرین ولسوالۍ کې د مقاومت جبهې د یوه غړي جسد ته پر سپکاوي تورن کړي دي.
خبرپاڼه کاږي: «دغو جنایتکارانو ته سزا ورکړه خپل هېوادنی رسالت او همداراز دیني او انساني وجیبه بولو. دوی دې زموږ قاطع او غاښ ماتوونکي ځواب ته په تمه واوسي، دوی به د خپلو جنایتونو بیه هرو مرو پرې کړي».
ازادۍ جبهې څرګنده کړې، چې د هېواد په شمال کې د طالبانو «عسل» میاشت پای ته رسېدلې او همداراز یې په یادو ولایتونو کې د وژل شویو کسانو کورنیو ته تسلیت ویلی دی.
طالبانو لا تر اوسه د دغو پېښو په تړاو څه سپیناوی نهدی کړی.
