په غور کې د طالبانو د عامې روغتیا ریاست وايي، چې د دوو مرستندویه ادارو په مرسته یې د لرې پرتو سیمو د روغتیايي خدماتو د ښه والي په موخه ۱۳د بیارغونې پروژې بشپړې کړې او ګټې اخیستنې ته سپارلې دي.
د طالبانو د غور ولایت د عامې روغتیا ریاست چارواکي وايي، چې په دې پروژو کې ۱۱ روغتیايي مرکزونه چې په الفاروق، ساغر، پسابند او لعل او سرجنګل ولسوالیو کې موقعیت لري، له کتنځي، زېږنتون، واکسین مرکزونو، اوبو رسونې سیسټمونو، طبي تجهیزاتو او نورو اړینو اسانتیاوو سره یو ځای فعال شوي دي.
د طالبانو تر کنټرول لاندې د باختر اژانس د راپور له مخې، د پروژو ټول لګښت ۲۳ میلیونه او ۸۰۰ زره افغانۍ و، چې د اکشن اید او ورلډ ویژن موسسو په مالي ملاتړ پلې شوې.
راپور زیاتوي چې د دغو پروژو بشپړېدل د غور د لرې پرتو سیمو د روغتیايي خدماتو په ښه والي کې مهم ګام دی او خلکو ته د باکیفیته درملنې اسانتیا برابروي.
