له اسلاماباد نه کراچۍ ته تلونکی یو مساپر وړونکی بس په چکوال کې یوې کندې ته لوېدلې، چې له امله یې د ښځو په ګډون ۵ کسان مړه او ۲۷نور ټپیان شوي دي. ځایي چارواکو ویلي، دغه پېښه د جيټي روډ په ډهوک پټان سیمه کې رامنځته شوې چې د یادې پېښې ټپیان روغتون ته لېږدول شوي دي.
د راپورونو له مخې؛ په دغه ټپیانو کې ۷ ښځې هم شاملې دي او د ځینو هغو روغتیایي حالت نازک ښودل شوی. پاکستاني چارواکي د سړکونو خرابوالی او چټګ مزل د دغه پېښې لامل ګڼي.
ایران انټرنشنل په یوه ځانګړي راپور کې ویلي، چې له څلورو ورځو راهیسې ایرانپلوه عراقي وسلهوالو د ایران د لاریونونو د ځپلو په موخه د ایراني ځواکونو د ملاتړ لپاره د خپلو کسانو جلب او جذب پیل کړی دی. سرچینې زیاتوي، تر دې دمه شاوخوا ۸۰۰ عراقي شیعه وسلهوال ایران ته استول شوي دي.
ایران انټرنشنل په خپل ځانګړي راپور کې ویلي، چې ایران ته لېږدول شوي ۸۰۰ عراقي شیعه وسلهوال زیاتره د کتایب، حزبالله، حرکتالنجباء، سیدالشهدا او بدر ډلو غړي دي.
په خبر کې راغلي، چې د عراق حکومت له ایران سره د مرستې لپاره د دې ځواکونو له خوځښت څخه خبر دی.
ایران انټرنشنل ته رسېدلي راپورونه ښيي، چې د دغو ځواکونو لېږد د شلمچې، چذابه او خسروي له درېیو سرحدي دروازو ترسره کېږي او رسمي لاره یې «مشهد ته د امام رضا د مقدسو ځایونو د زیارت سفر» ښودل شوې ده. خو په واقعیت کې دغه ځواکونه په اهواز کې د خامنهیي په اډه کې راټولېږي او بیا بېلابېلو سیمو ته د تاوتریخوالي ډکو لاریونونو د ځپلو لپاره استول کېږي.
د ونزوېلا د اپوزیسیون اصلي مشرې ماریا کورینا ماچادو اعلان وکړ، چې هغه غواړي د امریکایی ځواکونو لهخوا د نیکولاس مادورو له نیول کېدو وروسته ژر تر ژره هېواد ته ستنه شي. هغې د ازادو ټاکنو ترسره کول له اوسني ناورین څخه د وتلو یوازینۍ لاره ګڼلې.
د رویټرز د راپور لهمخې د مادورو حکومت له ځينو څېرو سره د همکارۍ لپاره د ټرمپ ادارې متحاط چلند اندېښنې زیاتې کړې دي.
د رویټرز په وینا، د مادورو له نیول کېدو وروسته د ونزوېلا د اپوزیسیون نوموتې مشرې په خپل لومړي دریځ کې ویلي، چې ونزوېلا ته د بېرته ستنېدو او د سیاسي لېږد د بهیر د پرمخ بېولو لپاره چمتو ده. ماچادو ټینګار وکړ، چې د هغې تر مشرتابه لاندې غورځنګ د «ازادو او عادلانه» ټاکنو په صورت کې د پرېکنده بریا توان لري.
ماچادو له فاکس نیوز سره په مرکه کې د نیکولاس مادورو د نیولو په اړه د ډونالډ ټرمپ د اقدام ستاینه وکړه او ویې ویل، چې دا پېښه کېدای شي د ونزوېلا په تاریخ کې یو مهم بدلون راولي. هغې ادعا وکړه، چې که رښتینې ټاکنې ترسره شي، اپوزیسیون به له ۹۰ سلنې ډېرې رایې ترلاسه کړي.
خو ټرمپ ویلي، چې تر هر ډول ټاکنو مخکې باید د دې هېواد وضعیت باثباته شي او د رایه ورکولو لپاره ټاکل شوی لنډمهاله مهالوېش یې «غېرواقعي» بللی دی.
په ورته وخت کې د رویټرز راپور ښيي، چې د ټرمپ اداره دا مهال د ثبات د ساتلو لپاره د د مادورو نږدې ملګرې او لنډ مهاله ولسمشرې ډیلسي رودریګز سره همکارۍ ته لومړیتوب ورکوي؛ دا دریځ د اپوزیسیون له نیوکو او د ونزوېلا د ټولنې د یوې برخې، په ځانګړي ډول د کډوالو له اندېښنو سره مخ شوی دی.
ماچادو د ۲۰۲۴ کال په ټاکنو کې له نوماند کېدو منع شوې وه، یو ځل بیا ټینګار وکړ چې هغه ټاکنې «ډیزاین شوې» وې او اپوزیسیون ترې له بریا بېبرخې کړل شو.
هغې رودریګز د ځپنې، فساد او د نشه يي توکو د قاچاق د جوړښت له مهمو څېرو وبلله او د روسیې، چین او ایران په څېر متحدانو سره یې د هغه اړیکو ته اشاره وکړه.
د افغانستان او پاکستان ترمنځ د ترینګلتیاوو پر دوام د پاکستان دفاع وزیر په تازه څرګندونو کې ویلي، اسلاماباد د افغان طالبانو او هند ترمنځ د نږدېوالي له امله پر طالبانو باور نهلري. نوموړي ټینګار کړی، هېواد یې د دې توان لري چې هممهاله د هند او افغان طالبانو پر وړاندې مقابله وکړي.
خواجه اصف د سېشنبې په ورځ (د مرغومي ۱۶مه) له «جیونیوز» سره په خبرو کې د افغان طالبانو او نوي ډیلي ترمنځ د اړیکو په اړه اندېښنه وښوده او زیاته یې کړه، چې پاکستان د خپلو ختیځو او لوېدیځو پولو په اوږدو کې د هر ډول «تېري» پر وړاندې بشپړ چمتووالی لري.
د پاکستان اړیکې له هند او افغان طالبانو سره په وروستیو میاشتو کې له ترینګلتیاوو سره مخ دي. پاکستان تېر کال د مې په میاشت کې له هند سره څلور ورځنۍ جګړه وکړه او څو میاشتې وروسته د اکټوبر په میاشت کې یې له افغان طالبانو سره د ډیورنډ کرښې په اوږدو کې نښتې وکړې. دا نښتې د دواړو خواوو ترمنځ اړیکې لا پسې کړکېچنې کړې او سیمهییز وضعیت یې لا بېثباته کړ.
که څه هم د بېلابېلو اړخونو لهخوا هڅې شوې، چې د افغانستان او پاکستان ترمنځ اړیکې بېرته عادي شي، خو دواړه هېوادونه یو بل ته داسې شرطونه اېږدي، چې تر دې دمه هېڅ لوري نهدي منلي. د همدې شرطونو پر سر اختلافات لا هم دوام لري او دا وضعیت د دواړو هېوادونو ترمنځ د باور فضا لا کمزورې کړې ده.
د پاکستان شرط دا دی، چې افغان طالبان باید د تحریک طالبان پاکستان (ټيټيپي) له ملاتړ څخه لاس واخلي. په مقابل کې، د طالبانو شرط دا دی چې پاکستان باید تضمین ورکړي چې د هر ډول شخړو او ستونزو پر مهال به د افغانستان پر حاکمیت تېری نهکوي، د دواړو هېوادونو ترمنځ به لارې نه بندوي او د سرحدي دروازو په تړلو سره به افغان ولس ته ستونزې نه جوړوي.
د طالبانو او پاکستان ترمنځ له دې ترینګلتیاو او شخړو وروسته، لومړی قطر بیا ترکیې او وروسته سعودي عربستان د دواړو هېوادونو ترمنځ منځګړیتوب وکړ، خو د یادو هېوادونو په منځګړیتوب ټول مذاکرات له کومې مطلوبي پایلې پرته پای ته ورسېدل او لا هم د افغانستان او پاکستان ترمنځ ټولې سوداګریزې لارې او هر ډول تګراتګ په ټپه ولاړې دي.
د پاکستان د دفاع وزیر په خپله نننۍ مرکه د دې پوښتنې په ځواب کې چې ایا هېواد یې د دوو جبهو جګړې توان لري که نه، وویل: «موږ په بشپړه توګه چمتو یو».
په ورته وخت کې د پاکستان د پوځ ویاند شریف چودري د سېشنبې په ورځ افغان طالبان د نرېندرا مودي له حکومت سره په تړاو تورن کړل.
دا په داسې حال کې ده، چې له پاکستان سره د ترینګلتیا له زیاتېدو وروسته افغان طالبانو له هند سره خپلې اړیکې پراخې کړې دي. په تېرو دوو میاشتو کې د طالبانو د درېیو وزیرانو په ګډون څو لوړپوړي چارواکي نوي ډیلي ته تللي دي. طالبان هیله لري، چې هند به د افغانستان په بازار کې د پاکستان د اقتصادي تشې یوه برخه ډکه کړي.
خواجه اصف همداراز له هند سره د تېر کال جګړې ته په اشارې سره وویل، چې د پاکستان جنګي الوتکې په دغه نښته کې «عملي ازمویل شوې» او زیاته یې کړه، چې هېواد یې د دغو الوتکو لپاره د پام وړ سپارښتنې ترلاسه کړې دي.
د پښتونخوا ملي عوامي ګوند مشر محمود خان اڅکزی وایي، چې د ولس له خوښي پرته جوړ شوی پارلمان د پاکستان له روان ناورین سره مقابله نهشي کولی. نوموړي ټینګار کړی، چې د هېواد اوسنی حکومت باید منحل شي او د ټولو سیاسي ګوندونو له استازو جوړه یوه لنډمهاله اداره اعلان شي.
محمود خان اڅکزي د سېشنبې په ورځ (د مرغومي ۱۶مه) پر اېکس لیکلي، چې باید د ټولو سیاسي ګوندونو له استازو جوړه لنډمهاله اداره اعلان شي، نوی ټاکنیز کمېشنر وټاکل شي او هېواد د رڼو ټاکنو پر لور ولاړ شي.
اڅکزي د هېواد وضعیت خطرناک بللی او ویلي یې دي: «وزیران او جنرالان داسې څرګندونې کوي، چې د ګاونډیو پر وړاندې د جګړې فضا جوړوي».
نوموړي اندېښنه ښودلې، چې سیمه د جګړې په میدان بدلېدونکې ده.
محمود خان اڅکزي د قانون په چوکاټ کې د پوځ د پاته کېدو هیله ښودلې او ویلي یې دي. «موږ له خپل پوځ سره دوښمني نهلرو، خو څنګه چې د نړۍ پوځونه د اساسي قانون په چوکاټ کې کار کوي، زموږ پوځ هم باید د اساسي قانون په حدودو کې پاتې شي».
نوموړي دغه څرګندونې په داسې حال کې کړي، چې همدا نن د پاکستان د پوځ ویاند په یوه خبري غونډه کې وویل، په افغانستان کې نه ټولګډونه حکومت شته او نه هم ترهګري ختمه شوې، بلکې «دا هېواد د ترهګرو او غېردولتي وسلهوالو» پر مرکز بدل شوی. خو د طالبانو ویاند ذبیحالله مجاهد بیا دا څرګندونې غېرمسوولانه او پاروونکې وبللې. مجاهد د پاکستان له اړوندو ادارو غوښتي، چې د رسمي دریځونو له چوکاټه د وتلو او د افغانستان په اړه د بېمنطقه تبلیغاتو پر ځای د خپلو داخلي مسایلو پر حل تمرکز وکړي.
د اوکراین د متحدو هېوادونو اېتلاف په پاریس کې په خپلې غونډه کې د اوکراین لپاره د ناټو په څېر د امنیتي تضمینونو د وړاندې کولو په چوکاټ کې نوی پرمختګ کړی دی.
د غونډې موخه دا وه، چې د امکان تر حده د امنیتي تضمینونو لپاره د هېوادونو ونډې وروستۍ شي، څو کییف ته له روسیې سره د احتمالي اوربند تر ټینګېدو وروسته اړین ډاډ ورکړل شي.
دا میکانېزم د اوکراین د حاکمیت د ساتنې، د پوځي وړتیاوو د پیاوړتیا او د هر ډول احتمالي اوربند د څار لپاره د یوه ځواکمن سیستم د جوړولو په هدف رامنځته کېږي.
د دې ناستې تر پای وروسته د امریکا د ولسمشر ډونالډ ټرمپ ځانګړي استازي سټیو وېټکاف په پاریس کې اعلان وکړ، چې د اوکراین اړوند امنیتي پروتوکولونه تر ډېره حده وروستي شوي دي.