د پاکستان دفاع وزیر خواجه اصف د دوشنبې په ماخوستن (د سلواغې ۱۳مه) په خپله اېکسپاڼه لیکلي، د کرېکټ د ژوندي ساتلو لپاره باید د کرېکټ لپاره یوه نوې نړۍواله اداره رامنځته شي، ځکه په باور یې د کرېکټ نړۍواله شورا یا ایسيسي په سوېلي اسیا کې د هند د سیاسي ګټو په لومه کې راګیر شوې ده.
هغه زیاته کړې: «د کرېکټ د نجیبانه لوبې د روح د ژوندي ساتلو لپاره یوې نوې نړۍوالې کرېکټ ادارې ته اړتیا ده، ځکه د کرېکټ نړۍواله شورا په سوېلي اسیا کې د هند د سیاسي ګټو په لومه کې ده».
په داسې حال کې چې د هند او سریلانکا په کوربهتوب د ۲۰۲۶ کال شل اوریز کرېکټ نړۍوال جام ته یوازې څو ورځې پاتې دي، پاکستان په لومړیو کې په یاد نړۍوال جام کې د روښانه دلیل له وړاندې کولو پرته د پرېکون اعلان کړی وو، خو پرون یې (یکشنبه د سلواغې ۱۲مه) اعلان وکړ، چې د دغه هېواد د کرېکټ ملي لوبډلې ته یې د ۲۰۲۶ کال په کرېکټ نړۍوال جام کې د ګډون اجازه ورکړې، خو د پاکستان لوبډله به د هند د کرېکټ لوبډلې سره لوبه ونهکړي.
د پاکستان د حکومت لهخوا په خپره شوې اعلامیه کې له هند سره د نه لوبېدو د پرېکړې روښانه لامل نه دی ذکر شوی، خو ویل کېږي چې دا پرېکړه د دواړو هېوادونو ترمنځ د روانو سیاسي ترینګلتیاوو لهمخې شوې ده.
تر دې وړاندې د بنګلهدېش کرېکټ بورډ د کرېکټ له نړۍوالې شورا څخه غوښتنه کړې وه، چې په نړۍوال جام کې د یاد هېواد لوبې دې د هند پر ځای په سریلانکا کې تنظیم شي، خو د بنګلهدېش یاده غوښتنه ونهمنل شوه او هغوی له نړۍوال جام سره پرېکون اعلان کړ.
اوس پاکستاني رسنیو ویلي، چې د پاکستان کرېکټ بورډ ادارې د کرېکټ نړۍوالې شورا ته ویلي، چې د کرېکټ په شل اوریز نړۍوال جام کې به له هند سره یوازې هغه مهال لوبه وکړي، چې د بنګلهدېش غوښتنه ومنل شي او د لوبډلې سیالۍ یې د هند پر ځای سریلانکا ته ولېږدول شي.
د پاکستان کرېکټ بورډ لا تر اوسه په دې تړاو په رسمي توګه څه نهدي ویلي.
د کرېکټ په را روان نړۍوال جام کې په راپورته شوي جنجال کې چې د پاکستان دفاع وزیر هم راښکېل شوی، د سپورټ برخې کارپوهان وایي چې سپورټ له سیاست څخه جلا دی او د دفاع وزیر په څېر کسانو ته نهښايي چې په سپورټي چارو کې فرمایشات ولري.
دا په داسې حال کې ده، چې د کرېکټ نړۍوالې شورا ویلي، چې د پاکستان لهخوا له هند سره د لوبې پرېکون په تړاو یې تر اوسه کوم رسمي لیک نهدی ترلاسه کړی، خو تمه لري چې پاکستان د خپلې پرېکړې په اړه د یوې داسې هوکړې لپاره لارې چارې ولټوي چې د ټولو لورو په ګټه وي.
د کرېکټ نړۍوالې شورا خبرداری ورکړی، چې دا ډول انتخابي ګډون د نړۍوالو سیالیو له اصولو سره په ټکر کې دي او پاکستان باید پر دغې کړې پرېکړې بیا کتنه وکړي، ځکه دا پرېکړه به د کرېکټ پر نړۍوال سیستم اغېز وکړي او میلیون ډالري زیان به هم رامنځته کړي.
