جرمني هغو ۷۹ افغان پناهغوښتونکو ته چې شاوخوا ۳ اونۍ مخکې د کابل په یوه میلمستون کې د طالبانو له لوري تر پوښتنو لاندې نیول شوي وو، ویزه ورنهکړه. افغانستان انټرنشنل د مرغومي ۲۹مه راپور ورکړ، دغه کسان چې جرمني ته د لېږد په تمه وو، له پاکستان څخه په زوره اېستل شوي دي.
د افغانستان انټرنشنل په یاد راپور کې راغلي وو، چې یادو کسانو د جرمني له لوري د منل کېدو ژمنه درلوده او په دې تمه یې په پاکستان کې شپې او ورځې تېرولې چې ګوندې ژر تر ژره جرمني ته ولېږدول شي.
دغه کسان چې پهکې ښځې، نارینه، ماشومان او ان ترانسجندر شامل وو، شاوخوا دوه میاشتې مخکې په پاکستان کې د ویزې مودې د پایته رسېدو له امله د پاکستاني پولیسو له لوري په زوره افغانستان ته ولېږدول شول او بیا د کابل په یوه میلمستون کې ځای پر ځای شول.
دغه کسان د جرمني سیمهییز کارکوونکي او تر ګواښ لاندې کسان دي.
د جرمني دولت اعلان کړی، چې د طالبانو له تحقیقاتو سره سره د یادو ۷۹ افغان پناهغوښتونکو وضعیت «ګواښوونکی» نهګڼي او هېڅ داسې دلیل هم نهګوري چې یادو کسانو ته د منل کېدو بیاځلي وعده ورکړي او لومړی یې پاکستان او له هغه ځایه یې بیا جرمني ته ولېږدوي.
د جرمني رسنیو د دغه هېواد د کورنیو چارو وزارت د چارواکو له قوله لیکلي، دغه هېواد په ټوله کې د منل کېدو د ژمنو شاوخوا نیمايي یې لغو او یا هم بېاعتباره کړي دي. دوی په ډاګه کړې، دغه ژمنې حقوقي الزامیت نهلري او د یادو کسانو د منلو په برخه «سیاسي ګټې» نشته.
د جرمني د کورنیو چارو وزارت په وینا، په دغه ډول کسانو کې امنیتي اندېښنې ډېرې محدودې وې، ځکه په څه باندې ۵۴۰۰ شویو مرکو کې یوازې شاوخوا ۳ سلنه امنیتي پېښې مطرح شوې وې.
په جرمني کې د چپي ګوند استازي کلارا بونګر دغه شمېر «د کډوالۍ فډرالې ادارې پر مخ درنه سپېړه» بللې ده. هغه ویلي، په کابل کې د یادو پناهغوښتونکو پر مېلمستون د طالبانو له یرغل وروسته دغه کسان په مشخص ډول تر ګواښ لاندې دي او په ټينګار سره یې څرګنده کړې چې، د جرمني دولت د هغوی د برخلیک مسوول دی.
د بشري حقونو فعالین هم د جرمني پر دولت په نیوکو سره وايي، یو شمېر افغانانو ته د منلو د وعدې له ورکړې سربېره لا هم یاد افغانان په بېبرخلیکۍ کې شپې او ورځې تېروي او ځینې یې د مرګ له ګواښ سره مخ کړي دي.
