په خیبر پښتونخوا کې د افغان کډوالو د جبري ستنېدو بهیر چټک شوی
د خیبر پښتونخوا د لنډي کوتل له سیمې سرچینې وایي چې په دغه سیمه کې د افغان کډوالو پر ضد روان عملیات نور هم چټک شوي دي.
د پاکستاني پولیسو په وینا، په تېرو څلورو ورځو کې یې د افغان کډوالو او هغو کسانو پر ضد څلور قضیې ثبت کړي چې افغانانو ته یې کورونه په کرایه ورکړي وو.
پولیس وایي، د خیبر پښتونخوا په بېلابېلو سیمو کې لارې تړل شوې او امنیتي پوستې زیاتې شوي دي، څو د خلکو اسناد په دقیقه توګه وڅېړي. د دوی په خبره، هغه افغانان چې د میشتیدنې قانوني اسناد نه لري، خبرداری ورکړل شوی چې خپل هېواد ته ستانه شي.
سیمه ایزو چارواکو ویلي، که یاد کسان تر ټاکلې مودې پورې ونه وځي، قانوني چلند به ورسره وشي.
همداراز د کورونو مالکانو ته هم خبرداری ورکړل شوی چې که بېاسناده افغانانو ته کورونه په کرایه ورکړي، د هغوی پر وړاندې به هم قانوني اقدام وشي.
