نیویارک ټایمز: ایران د جېنوا په ناسته کې امریکا ته سوداګریز وړاندیرونه کړي
نیویارکټایمز ورځپاڼې د جېنوا د اټومي خبرو له بهیر څخه د درېیو باخبره ایراني چارواکو په حواله راپور ورکړی، چې تهران له امریکا سره د مذاکراتو پرمهال د واشنګټن د رضایت ترلاسه کولو لپاره یو لړ اقتصادي وړاندیزونه مطرح کړي دي.
د سرچینو په وینا؛ په دغه وړاندیزونو کې له امریکایي شرکتونو سره په ځانګړي ډول د تېلو او انرژۍ په برخه کې د پانګونې او سوداګریزو همکاریو زمینې برابرول شامل دي. یادو چارواکو ویلي، چې د ایران حکومت چمتو دی د درېیو تر پنځو کلونو پورې د یورانیمو بډایه کول وځنډوي.
د یادې طرحې له مخې؛ له ټاکلې مودې وروسته به ایران وکولای شي د سیمې د یوې ګډې ټلوالې په چوکاټ کې او یوازې د ملکي موخو لپاره خپلو اړوندو اټومي چارو ته دوام ورکړي. همداراز تهران وړاندیز کړی، چې د یورانیمو په برخه کې خپلې زېرمې به د هېواد دننه او د نړۍوالو پلټونکو تر څار لاندې کمې کړي او په بدل کې یې د ایران اساسي غوښتنه د امریکا د مالي او بانکي بندیزونو لرې کول او د تېلو پر پلور د محدودیتونو پای ته رسول بلل شوي دي.
بل خوا د وال سټریت ژورنال په لیکنه کې راغلي، چې ایران هڅه کوي ډونالډ ترمپ دې ته وهڅوي چې د باراک اوباما دورې ته ورته سیاست غوره کړي؛ هغه سیاست چې د یادې ورځپاڼې په باور، له اټومي خبرو د پرمختګ ترڅنګ د ایران ځینې کورني بدلونونه هم له پامه غورځوي.
د ورځپاڼې د راپور پر بنسټ؛ په جېنوا کې وروستۍ خبرې اترې د همدې هڅو نښې ګڼل کېږي، خو ورته مهال په سیمه کې د امریکا د پوځي حضور زیاتوالي د واشنګټن د راتلونکې تګلارې په اړه پوښتنې راولاړې کړې دي.
