د بشري حقونو د څار سازمان په میناب کې د نجونو پر ښوونځي د برید د څېړلو غوښتنه وکړه
د بشري حقونو د څار سازمان د ایران په سوېل میناب کې د نجونو پر یوه ښوونځي د برید په اړه د جنګي جرمونو د څېړلو غوښتنه کړې چې له امله یې له ۱۶۵ زیات کسان چې ډېری یې ماشومان دي، وژل شوي دي.
دغه سازمان په یوې اعلامیه کې لیکلي، د برید بڼه ښيي چې دا برید د «ډېرو دقیقو او کنټرولکېدونکو مهماتو» په واسطه ترسره شوی دی. د بشري حقونو د څار سازمان ویلي، دغه ښوونځی د سپاه پاسداران د یوه استوګنیز کمپلکس دننه موقعیت درلود، خو له وسلهوالو او پوځي تاسیساتو بېل و او جلا دروازه یې درلوده.
د اسوشېټېډ پرېس خبري اژانس لیکلي، چې سپوږمکیز انځورونه، مسلکي تحلیلونه، د امریکا یو چارواکی او د امریکا او اسراییل د پوځونو لهخوا خپاره شوي عام معلومات ښيي، چې دغه چاودنه احتمالا د امریکا د هوايي بریدونو له امله رامنځته شوې ده.
د بشري حقونو د څار سازمان څېړونکې سوفیا جونز وویل: «د دغه برید په اړه باید چټکې او هر اړخیزې څېړنې ترسره شي؛ په دې معنا چې ایا مسوولو کسانو ته دا معلومه وه چې هلته ښوونځی دی او ایا دوی پوهېدل چې له غرمې مخکې به دا ځای له ماشومانو او ښوونکو ډک وي که او نه».
دا اعلامیه په داسې حال کې خپرېږي، چې د امریکا ولسمشر ډونالډ ټرمپ بیا اسلامي جمهوریت په میناب کې د نجونو پر ښوونځي د برید مسوول وباله. هغه وویل: «د هغه څه پر اساس چې ما لیدلي، دا د ایران کار و.» ټرمپ همدارنګه وویل، چې د اسلامي جمهوریت مهمات «خورا نادقیق» دي.
