د مخکیني جمهوري نظام لوړ پوړي پوځي جنرال سمېع سادات ویلي، چې د پاکستان له لوري تر اوسه د بریدونو په موخه د افغانستان خاورې ته ۱۰۰ الوتنې شوي او ټول یې ملکي وګړي په نښه کړي دي. هغه زیاته کړې، چې دې بریدونو کې د طالب مشرانو په ګډون د ټيټيپي هېڅ قومندان نهدی وژل شوی.
نوموړی همدا راز وایي، چې پاکستان په افغانستان کې یوازې هغه زیربناوې په نښه کړي چې افغانانو پورې تړاو لري. جنرال سادات پر خپلې اېکسپاڼه لیکلي: «موږ طالبان نه خوښوو، خو موږ له خپل هېواد سره مینه لرو او موږ پاکستان د دغو بریدونو مسوول ګڼو».
د هغه په باور، روانه جګړه عام افغانان او پاکستانیان نه غواړي، خو دا «شخړې یوازې د ګوډاګیانو او د هغوی د پخوانیو مالکینو ترمنځ دي». د نسکور شوي جمهوري نظام دې لوړپوړي چارواکي پر اسلام اباد غږ کړی، چې ژر تر ژره پر افغان خاوره خپل بریدونه ودروي.
د نوموړي په خبره، پاکستان د تېرې شپې بریدونو پر مهال په کندهار کې د کام اېر ملکي هوایي شرکت تاسیسات په نښه کړي دي. هغه زیاته کړې: «دا یوازنی فعال ملکي هوايي شرکت دی چې د افغانستان دننه او بهر الوتنې کوي».
جنرال سمېع سادات ویلي، پاکستان په خپلو بریدونو کې په درېیو اونیو کې ۵۰ ملکي افغانان وژلي دي.
له دې سره هم مهاله د طالبانو دفاع وزارت نن ویلي، چې ډرون الوتکو یې د پاکستان د پلازمېنې اسلام اباد په فیض اباد سیمه کې د پاکستاني پوځ د حمزه په نوم کمپ په نښه کړی دی. طالبانو ادعا کړې، چې دغو بریدونو کې یې له مالي زیانونو سربېره پاکستاني پوځیانو ته هم درنه مرګ ژوبله اړولې ده.
