فضلي: پر افغانستان د پاکستان بریدونه د ‌ټي‌ټي‌پي په اړه نه‌دي دا د سیمې بې‌ثباتۍ لپاره دي

هغه زیاته کړې، چې د ملګرو ملتونو د امنیت شورا باید پر پاکستان فشار راوړي، څو د افغانستان پر خاوره بریدونه ودروي.

اتمر په یوې اعلامیه کې ویلي، چې دغه «وحشیانه بریدونه» یو ځل بیا د افغانستان د بې‌ګناه ولس ترمنځ د ملکي وګړو د مرګ‌ژوبلې ناورین رامنځته کړی او د سیمې د امنیت او ثبات په اړه یې جدي اندېښنې راپارولي دي.

هغه د افغانستان لپاره د ملګرو ملتونو د مرستندویه پلاوي له دفتر (یوناما) وغوښتل، چې د دې پېښې په اړه بې‌طرفه او هر اړخیزې پلټنې ترسره کړي او پایلې یې په روښانه او شفافه ډول له عامو خلکو سره شریکې کړي.

د بهرنیو چارو دې پخواني وزیر همدارنګه د ملګرو ملتونو له امنیت شورا وغوښتل، چې د دې خطرناک حالت د دوام د مخنیوي لپاره اغېزمن او عملي ګامونه پورته کړي. د هغه په وینا، که دا ډول بریدونه دوام ومومي، ښايي وضعیت له کنټرول څخه ووځي او د سیمې او ان تر هغې هاخوا د سولې او امنیت لپاره جدي ګواښ جوړ کړي.

اتمر ټینګار وکړ، چې د ملګرو ملتونو امنیت شورا کولی شي او باید د پاکستان حکومت دې ته اړ کړي چې د ګاونډي هېواد پر خاورې له «نه توجیه کېدونکي تېري» لاس واخلي. هغه همدارنګه وړاندیز وکړ، چې دغه شورا دې د ترهګرۍ پر ضد د مبارزې د وضعیت او د دواړو لوریو د ژمنو د کچې د ارزونې لپاره خپلواکه څارنه رامنځته کړي.

د اتمر په وینا: «د پاکستان پوځ باید پوه شي چې پر داسې هېواد هوايي بریدونه چې د هوايي دفاع وړتیا نه لري، نه زړورتیا بلل کېدای شي او نه هم دا کار د ټاکل شویو موخو په ترلاسه کولو کې اغېزمن تمامېږي».

هغه خبرداری ورکړ، چې د دې ډول بریدونو پایله به له شک پرته د تاوتریخوالي زیاتوالی او لا ډېره بې‌ثباتي وي او ټینګار یې وکړ، چې د پاکستان حکومت باید د عقلانیت، خبرو اترو او مسوولیت‌ منونکي چلند لاره خپله کړي.

هغه له یوې داخلي خصوصي رسنۍ سره په مرکه کې ویلي: «له ټولو هېوادونو غواړو چې دغه جنایتونه وګوري؛ هغه جنایت چې پاکستان په افغانستان کې ترسره کوي په غزه کې د اسراییل جنایتونو ته ورته دي».

ذبیح‌الله مجاهد وايي، پاکستان هڅه کوي چې سیمه نا‌امنه کړي او په وینا یې: «نور هېوادونه باید چوپ پاتې نه‌شي. ټول د سیمې د امنیت، ثبات او اقتصادي پرمختګ کې مسوولیت لري. نور هېوادونه باید له هغو دسیسو چې له لرې جوړ او د پاکستان د نظامي رژيم له لوري عملي کېږي، مخنیوی وکړي».

د نوموړي په باور، اوس دغه شخړه یوازې د افغانستان او پاکستان تر منځ نه‌ده، بلکې د پاکستان له لوري له لویو قدرتونو په اخیستل شوي ماموریت کې دغې شخړې سیمه‌ییزه بڼه خپله کړې ده.

هغه همداراز ویلي: «دغو جنایتکارانو [پاکستان] باید ځواب ورکړل شي، باید دا درک کړي، چې د دغو جنایتونو بیه به ډېره درنه وي».

هغه له یوې داخلي خصوصي رسنۍ سره په مرکه کې ویلي: «اوس په جګړه کې یو. هغو [پاکستان] وحشت رامنځته کړی. نه‌غواړو پر ډيپلوماسۍ ډېر تمرکز وکړو. هغوی باید نظامي ځواب ته په تمه واوسي».

د نوموړي په باور، پاکستان په قصدي توګه روغتیايي مرکز په نښه کړی، څو وحشت او وېره خپره کړي او همداراز یې خبرداری ورکړ: «موږ به له خپلو خلکو دفاع وکړو او له دوښمن څخه به ډېر سخت غچ واخلو. دا به د پاکستان نظامي رژيم ته ډېره سخته او درنه تمامه شي».

هغه همداراز ویلي: «دا د افغانانو حق دی چې غچ واخلي او جنایتکاران په خپلو ځالو کې وځپي».

شرافت زمان امرخېل زیاتوي، د کابل- جلال‌اباد پر لویه لاره په هودخېلو سیمه کې د معتادینو د درملنې په مرکز کې څه باندې ۳ زره معتادین تر درملنې لاندې وو. د نوموړي په وینا، پاکستاني پوځ چې د یاد روغتیايي مرکز پر کومې ساحې بمبار کړی هلته څه باندې ۲۰۰ معتادین تر درملنې لاندې وو.

هغه وايي، تر اوسه د وژل شویو کسانو کره شمېر معلوم نه‌دی، خو شاوخوا ۱۵۰ کسان نورو روغتونونو ته د درملنې لپاره لېږدول شوي دي.

د هغه په وینا، د ژغورنې عملیات لا هم روان دي.

تادین خان پر کابل او یو شمېر نورو ولایتونو د پاکستان د دوشنبې شپې د بریدونو په غبرګون کې ویلي، چې بهرنیو لاسوهنو هېواد ته داخلي جنګونه راوړي او افغان ملت يې په پردیو جګړو کې ښکېل کړی.

نوموړي زیاته کړې، «له دې سره سره پاکستان دې دا نه‌ هېروي چې افغانان یو لوی ملت دي او حکومتونه هېوادونه نه‌شي ساتلی، دا ملتونه دي چې هېوادونه ساتي».

تادین خان د نړۍوالو له امنیتي او بشري حقونو اړوندو سازمانونو څخه غوښتنه کړې، چې په افغانستان کې د پاکستان د پوځ بریدونو د څېړلو لپاره دېیوه کمېټه جوړه کړي.

هغه همداراز ویلي: «موږ په افغانستان کې د عاجلې، ریښتینې ملي لویې جرګې د جوړېدو غوښتنه کوو، تر څو ملت خپل سرنوشت، اساسي قانون، مشروع حکومتولي، بهرنۍ او داخلي پالیسي او ستراتیژیکې ګټې پخپله پکې تعریف کړي».