د پښتون ژغورنې غورځنګ مشر منظور پښتین په کابل کې پر یوه روغتون د پاکستان هوايي برید ته په غبرګون کې ویلي، چې د پاکستان علماوو په هره دوره کې د کابل د ورانولو فتواوې ورکړې دي، نور دې لږ تر لږه له دغو بېګناه وګړو او په روغتون کې د پرتو ناروغانو له ټوټه ټوټه جسدونو څخه حیا وکړي.
منظور پښتین ویلي، «ترهګر پنجابي استعمار (پاکستان)» د کابل پر یوه روغتون ترهګریز هوايي بمبار کړی او له امله یې تر درملنې لاندې سلګونه بېګناه ملکي وګړي یې وژلي او ګڼ نور یې ټپيان کړي دي.
پښتین زیاته کړې: «موږ د دې دردونکې پېښې پر ضد د خپل افغان ولس ترڅنګ ولاړ یو. پيټياېم به د نړۍ هر ګوټ ته د دې مظلومې وینې غږ رسولو لپاره خپله طرحه جوړوي».
هغه په ډاګه کړې، په لر او بر کې د «استعماري قوتونو» او پروژو ظلمونه ورځ تر بلې زیاتېږي او زیاته کړې یې ده: «په داسې وخت کې په لوی زړه سره د مِلي مشورې او مِلي قیام انتظام به د ملت قوت یو کړي چې ملت ته به یې ډېره ګټه او دوښمن ته به یې ډېر زیان وي».
