د بشري حقونو نړۍوال بنسټ په کابل کې د روږدو د درملنې پر مرکز د پاکستان برید وغانده

ګلبدین نایب ویلي، د ملکي وګړو په نښه کول په هر نوم او هر دلیل چې وي، د بشري اصولو او نړۍوالو قوانینو له ارزښتونو سره ښکاره په ټکر کې دي او زیاتوي: «دا ډول کړنې نه یوازې د تاوتریخوالي دوام ته لار هواروي، بلکې د سیمې ثبات او متقابل باور هم زیانمنوي».

نایب د افغانستان ملي حاکمیت، ځمکنۍ بشپړتیا او د ولس پر خوندیتوب د ټينګار تر څنګ ویلي: «موږ له نړۍوالې ټولنې او د بشري حقونو له اړوندو بنسټونو غواړو چې د دغو پېښو په اړه بې‌طرفه څېړنه ترسره کړي او د ملکي وګړو د خوندیتوب لپاره عملي ګامونه واخلي».

هغه له زیانمنو کورنیو سره خواخوږي څرګنده کړې او په ډاګه کړې یې ده، چې افغان ولس به د خپل ملي یووالي، متقابل ملاتړ او ټینګې ارادې له لارې د هر ډول ننګونې پر وړاندې ولاړ پاتې شي.

راشد خان ویلي، د بې‌ګناه انسانانو قیمتي ژوند ته نه‌درناوی په ځانګړې توګه د روژې په مبارکه میاشت کې، زړه بوږنونکی عمل دی او په باور یې: «دا ډول جنایت نفاق او کرکې ته لمن وهي».

هغه له نړۍوالو سازمانونو غوښتي، چې په کابل کې د روږدو د درملنې پر مرکز د برید له عاملینو سره حساب وکړي.

هغه ویلي: «زه په ملګرو ملتونو او نورو بشري حقونو ادارو غږ کوم چې د دې وروستۍ فاجعې بشپړه څېړنه وکړي او عاملینو سره یې حساب وکړي. زه په دې سخت وخت کې د خپل دردېدلي ملت تر څنګ یم او ځان په دې لوی غم کې د خپل ولس سره شریک بولم».

هغه همداراز په ډاګه کړې، تاریخ د دې شاهد دی چې افغانان به د یوه ملت په توګه بیا راپورته کېږي.

هغې پر اېکس‌پاڼه لیکلي، پر روغتونونو او ملکي وګړو برید د نړۍوالو بشردوستانه قوانینو له منل شویو اصولو څخه ښکاره سرغړونه ده او باید په جدي توګه وڅېړل شي.

نوموړې همدارنګه ټینګار کړی، چې دا بمبارۍ او د پاکستان نور بریدونه چې په تېرو څو میاشتو کې شوي او د ملکي خلکو د مرګ‌ژوبلې لامل ګرځېدلي دي، باید په دقیقه توګه مستند شي، وارزول شي او تعقیب شي.

د افغانستان د بشري حقونو د خپلواک کمېسیون پخوانۍ مشرې زیاته کړې، چې پاکستان او طالبان باید دې وېروونکي وضعیت او وینې تویېدنې ته د پای ټکی کېږدي.

رحمت‌الله نبیل دغه کوردینات په خپله اېکس‌پاڼه خپاره کړي او تلویحاً داسې ښکاري، چې طالبانو ته یې په نښه کړي دي.

هغه ویلي: «په کابل کې له نننۍ حملې څخه وروسته د پاکستان په خاوره کې د ریښتینې ارادې په صورت کې دا مشروع هدفونه دي».

د تېلو ترمینل – محمودکوټ PARCO

30.206° شمالي عرض البلد

70.956° ختیځ طول البلد

له افغانستان څخه فاصله: شاوخوا ۴۵۰–۵۰۰ کیلومتره

نږدې ولایتونه: کندهار او هلمند

د شکرپور د تېلو زېرمتون (Oil Depot)

27.955° شمالي عرض البلد

68.638° ختیځ طول البلد

له افغانستانه فاصله: شاوخوا ۳۰۰–۳۵۰ کیلومتره

نږدې ولایتونه: نیمروز او هلمند

د اُچ د ګاز د پروسس او LPG فابریکه

28.300° شمالي عرض البلد

69.850° ختیځ طول البلد

له افغانستانه فاصله: شاوخوا ۲۵۰–۳۰۰ کیلومتره

نږدې ولایتونه: کندهار او هلمند

د لورالای د سون توکو زېرمتون (Fuel Depot)

30.370° شمالي عرض البلد

68.600° ختیځ طول البلد

له افغانستانه فاصله: شاوخوا ۱۲۰–۱۵۰ کیلومتره

نږدې ولایتونه: پکتیکا او زابل

د کوهاټ د LPG د زېرمتون ترمینل

33.580° شمالي عرض البلد

71.440° ختیځ طول البلد

له افغانستانه فاصله: شاوخوا ۱۵۰–۱۸۰ کیلومتره

نږدې ولایتونه: خوست او پکتیا.

رحمت‌الله نبیل په کابل کې د معتادینو د درملنې پر مرکز د پاکستان هغه بمبار چې له امله یې سلګونه ملکي وګړي وژل شوي د «شرم داغ» بللی او ویلي یې دي، چې دا به هېڅکله هم د افغان ولس له حافظې پاک نه‌شي او زیاته کړې یې ده: «د ناروغانو او بې‌وسه انسانانو په نښه کول نه -امنیتي عملیات- بلل کېدای شي او نه د ترهګرۍ پر ضد مبارزه-؛ دا د انسان د ژوند پر وړاندې ښکاره بې‌پروايي او د بشري اصولو ښکاره سرغړونه ده».

نبیل همداراز په ډاګه کړې، هېڅ هېواد د ملکي وګړو په وژلو امنیت نه‌‌شي تر لاسه کولای او دغه ډول کړنې یوازې کرکه، بې‌باوري او بې‌ثباتي لا ژوروي.

هغه ویلي: «نړۍواله ټولنه نه‌شي کولی د داسې یوې فاجعې پر وړاندې چوپه پاتې شي؛ د انسان ژوند د سیاسي لوبو وسیله نه‌ده».

فضل محمود فضلي زیاته کړې: «په حقیقت کې، پاکستان هېڅکله په خپله تر ولکې لاندې خاوره کې له ټي‌ټي‌پي سره مقابله نه‌ده کړې، په افغانستان کې خو یې لا څه کوې».

د هغه په باور: «لکه څنګه چې د هغوی ملاتړي په فارس خلیج کې وارخطا دي، دا بې باکه لوبه به پاکستان ته په درنه بیه تمامه شي».

فضلي وايي، افغانستان له لسیزو راهیسې د جګړو سختۍ ګاللي او تر هغه وخته به د یوه ملت په توګه پاتې وي، چې دا سیاره موجوده وي او همداراز خبرداری ورکوي: «داسې څه بیا د پاکستان په اړه نه‌شي ویل کېدای».