د افغانستان د کرېکټ ملي لوبډلې لوبغاړي ګلبدین نایب پر کابل او ننګرهار د پاکستان د پوځ د تېرې شپې بریدونه غندلي او پر ملکي وګړو یې د بریدونو پر درېدو له ټینګار سربېره، له نړۍوالو غوښتي چې دغه پېښې وڅېړي او د ملکي وګړو د خوندیتوب لپاره لاس په کار شي.
ګلبدین نایب ویلي، د ملکي وګړو په نښه کول په هر نوم او هر دلیل چې وي، د بشري اصولو او نړۍوالو قوانینو له ارزښتونو سره ښکاره په ټکر کې دي او زیاتوي: «دا ډول کړنې نه یوازې د تاوتریخوالي دوام ته لار هواروي، بلکې د سیمې ثبات او متقابل باور هم زیانمنوي».
نایب د افغانستان ملي حاکمیت، ځمکنۍ بشپړتیا او د ولس پر خوندیتوب د ټينګار تر څنګ ویلي: «موږ له نړۍوالې ټولنې او د بشري حقونو له اړوندو بنسټونو غواړو چې د دغو پېښو په اړه بېطرفه څېړنه ترسره کړي او د ملکي وګړو د خوندیتوب لپاره عملي ګامونه واخلي».
هغه له زیانمنو کورنیو سره خواخوږي څرګنده کړې او په ډاګه کړې یې ده، چې افغان ولس به د خپل ملي یووالي، متقابل ملاتړ او ټینګې ارادې له لارې د هر ډول ننګونې پر وړاندې ولاړ پاتې شي.
