د «رواه» په نوم د ښځو د حقونو ملاتړ او پياوړتیا بنسټ د افغان نجونو پر وړاندې د زدهکړو دوامداره بندیز له بشري حقونو سرغړونه بللې او دا یې د افغانستان راتلونکې لپاره نه جبرانېدونکی زیان ګڼلی. دغه بنسټ له نړۍوالې ټولنې غوښتي، چې د زدهکړو په برخه کې دې پر طالبانو فشار زیات کړي.
یاد بنسټ د یوې خبرپاڼې په خپرولو سره له ملي او نړۍوالو بنسټونو غوښتنه کړې، چې د دغه «انساني او ښوونیز ناورین» پر وړاندې مسوولانه او بېړنی اقدام وکړي. دوی ټينګار کړی، چې په افغانستان کې دې د نجونو ښوونځي له قید او شرط پرته پرانیستل شي.
د ښځو د یاد بنسټ په خبرپاڼه کې راغلي: «د دغه پراخې سرغړونې د ثبت او څار لپاره دې نړۍوال سازمانونه او د بشري حقونو مدافعین فعال رول ادا کړي، د حساب ورکونې مېکانیزمونه دې رامنځ ته شي؛ ترڅو د ښځو او نجونو بنسټیز حقونه خوندي شي».
په خبرپاڼه کې له مدني فعالانو، رسنیو او نړۍوالو هم غوښتنه شوې، چې د افغان نجونو د حقونو لپاره غږ پورته کړي. د خبرپاڼې له مخې؛ «د بې عدالتۍ پر وړاندې چوپتیا د هغو ملاتړ معنا لري. د افغان نجونو ترڅنګ درېدل د عدالت او انسانیت ترڅنګ درېدل دي».
