په سویلي وزیرستان کې خلک د مخابراتي او انټرنېټي شبکو د بندښت له امله شکایت کوي

سويلي وزيرستان د خیبر پښتونخوا یو له ناامنه سيمو څخه ده، چې په یاده موده کې ان د مخابراتي شبکو سېګنالونه هم خورا کمزوري وو چې له امله يي ځايي خلک له پراخو ستونزو سره مخ دي.
ځايي خلک شکایت کوي، چې د ټېکنالوژۍ په پرمختللي ننني دور کې دوی لاهم دغه اسانتیاوې ته لاسرسی نه‌لري. دوی وایي:« اړیکه د انسان یو بنسټیز حق او اړتیا ده؛ خو د سویلي وزیرستان ولسونه له دغې بنسټیزې اړتیا او حق نه بې‌برخې دي».
ورته مهال په سويلي وزيرستان کې د سوداګرۍ ټولنې ویلي، چې د اړیکو د نشتوالي له امله دوی ته ګڼ مالي زیانونه اوښتي او د ډیجېټلي بانکدارۍ د نشتوالي له امله یې له پېرېدونکو سره اړیکې اغېزمنې شوې دي.
بل لور ته په سویلي وزیرستان کې ځايي خبریالان هم د مخابراتي او انټرنېټي خدمتونو د پرې کېدو له امله اغېزمن شوي دي. دوی وایي، نه‌شي کولی پر وخت خبرونه راټول او له خپلو رسنیزو ادارو سره یې شریک کړي.
ځايي خلکو د پاکستان له مخابراتي او انټرنېټي شبکو غوښتنه کړې، چې ژر تر ژره دې د یادې سیمې د خلکو ستونزې درک او مخابراتي او انټرنېټي خدمتونو ته د خلکو د لاسرسي زمینه برابره کړي.