د پاکستان د پنجاب ایالت پولیس وایي، چې تر دې دمه تر ۳۴زره ډېر افغان کډوال په جبري توګه له دغه ایالت څخه په جبري توګه اېستل شوي دي. د پنجاب پولیسو پر اېکس پاڼه کاږلي، چې د پنجاب له ګوټ ګوټ څخه د بېاسناده افغان کډوالو د اېستلو لړۍ لاهم روانه ده.
د پنجاب پولیسو په وینا؛ له دې ډلې ۱۳زره او ۳۸۹ نارینه، ۶زره او ۹۶۳ ښځې او ۱۴زره او ۲۲۴ ماشومان شامل دي.
له بل پلوه د طالبانو د کډوالو او بېرته راستنېدونکو چارو وزارت خبر ورکړی، چې په تېرې وري میاشت کې ۱۱۱زره او ۳۲۴ کډوال له پاکستان، ایران او ترکیې په خپله خوښه او جبري توګه افغانستان ته ستانه کړای شوي دي.
د طالبانو د کډوالو او بېرته راستنېدونکو چارو وزارت ویاند عبدالمطلب حقاني وایي، چې له دې ډلې ۱۳زره او ۸۳۴ کورنۍ له پاکستان نه، ۸۲۳ کورنۍ له ایران نه او ۱۹ کورنۍ له ترکیې ستنې شوې دي.
تازه د بشري حقونو څار بنسټ په یوه تازه راپور کې ویلي، پاکستان کې د افغان کډوالو د جبري اېستنې او د پولیسو د ناڅاپي چاپو کچه په بېسارې ډول لوړه شوې. دوی وایي، چې اوسمهال په پاکستان کې افغان کډوال له لومړنیو خدماتو بېبرخې شوي او په دوامداره وېره کې شپې او ورځې تېروي.
په پاکستان کې د وګړو د ثبت ادارې سرچینو بیا ویلي، چې هره ورځ شاوخوا له ۵۰۰ تر ۶۰۰ پورې افغان کډوال د چمن پنډغالي ته لېږدول کېږي او هلته یې افغانستان ته د بېرته ستنېدو اسناد بشپړېږي.
