د فرهنګي محدودیتونو په اوج کې؛ د هلمند دودیزه کلنۍ مشاعره ترسره شوه
د طالبانو اطلاعاتو او کلتور وزارت وایي، د هلمند دودیزه کلنۍ مشاعره د سلګونو ګډونوالو په حضور کې په هلمند ولایت کې ترسره شوې ده.
په دې مشاعره کې د طالبانو د اطلاعاتو او فرهنګ وزارت د هنر او فرهنګ مرستیال عتیقالله عزیزي ویلي، چې د امنیت په فضا کې د بېلابېلو ولایتونو شاعرانو ګډون د ویاړ ځای دی. نوموړي د شعر او هنر ترڅنګ هلمند د «جهادونو» او د دوی په اصطلاح د «قربانیو» مرکز بللی.
دغه مشاعره داسې مهال ترسره کېږي، چې طالبان د خپلې واکمنۍ له پیل راهیسې پر فرهنګي او ادبي فعالیتونو پراخ محدودیتونه لګولي دي. د ګڼو شاعرانو او فرهنګي فعالانو په باور، اوسنیو مشاعرو خپل پخوانی ازاد ادبي رنګ له لاسه ورکړی او تر ډېره د طالبانو د رسمي روایتونو، ترانو، نعتونو او له مخکې ټاکل شویو منځپانګو تر اغېز لاندې دي.
د فرهنګي فعالانو په خبره، اوس مهال په ډېری مشاعرو کې شاعرانو ته اجازه نه ورکول کېږي چې له رسمي چوکاټ څخه دباندې انتقادي، ټولنیز یا سیاسي موضوعات مطرح کړي.
دا په داسې حال کې ده، چې د تیر جمهوريت پر مهال دودیزې مشاعرې د ازادو ادبي بحثونو، انتقادي شعرونو او فرهنګي تنوع مهم مرکزونه ګڼل کېدل. هغه مهال شاعرانو کولای شول د شعر له لارې د حکومت پر سیاستونو نیوکه وکړي او ښځو او نارینهوو پرته له جنسیتي محدودیتونو په دغو ادبي غونډو کې ګډون درلود.
خو اوس، د فرهنګي څارونکو په باور، د مشاعرو عمومي محتوا تر ډېره د طالبانو د نظام د مشروعیت، د ډلې د مشر د اطاعت او د اسلامي نظام د دوام پر تبلیغ راڅرخي؛ هغه څه چې د ادبي غونډو خپلواکي تر پوښتنې لاندې راولي.
تر دې وړاندې هم سرچینو ویلي وو، چې په کندهار کې د انارګل دودیزه مشاعره د طالبانو د سیاسي او اېډیالوژیکو پیغامونو د خپرولو پر منبر بدله شوې ده.
همداراز، د طالبانو د اطلاعاتو او کلتور وزیر شېراحمد حقاني په پروان ولایت کې د ارغوانګل کلنۍ مشاعرې پر مهال شاعرانو ته خبرداری ورکړی و، چې «هره موضوع» باید په شعر کې را نه وړل شي. د هغه په وینا، شاعران باید یوازې د «خیر، اصلاح او برکت» لپاره شعرونه ووایي.
