په ملګرو ملتونو کې د امریکا سفیر: ایران ته به اجازه ورنه کړو چې د نړۍ اقتصاد یرغمل کړي
په ملګرو ملتونو کې د امریکا سفیر مایک والتز د امنیت شورا د منځني ختیځ په غونډه کې وویل چې واشنګټن به ایران ته د نړۍ د اقتصاد د یرغمل کولو احازه ورنه کړي. والتز وویل: «موږ به اجازه ورنه کړو چې اسلامي جمهوریت د نړۍ اقتصاد برمته کړي».
هغه زیاته کړه چې ایران، د تفاهملیک له شتون سره سره، لا هم پر بېړیو او د سیمې پر هېوادونو بریدونو ته دوام ورکوي.
په ملګرو ملتونو کې د امریکا سفیر له ایران څخه وغوښتل چې د سولې او خبرو اترو لارې ته بېرته وګرځي. نوموړي وویل چې نړۍ، د ایران خلک او د دغه هېواد ګاونډیان د ایران له حکومت سره نه دي.
والتز د امنیت شورا له غړو او ټولو مسوولو هېوادونو وغوښتل چې خپل دریځ په روښانه ډول څرګند کړي.
هغه ټینګار وکړ چې د ایران د خلکو لپاره لا هم د یوه بېل او مثبت راتلونکي فرصت شته، خو د ولسمشر ډونالډ ټرمپ زغم هم یو حد لري او نړۍ نور د دې وضعیت لګښت نه شي زغملای.
