په امریکا کې یوه منصفه پلاوي هغه موټر چلوونکی تورن کړی، چې په جورجیا کې یې د ترافیکي پېښې پر مهال د یوه افغان خبریال په ګډون دوه کسان وژلي وو. د راپورونو له مخې، تورن کواډرامیل ویلیامز د پولیسو له تعقیب څخه د تېښتې پر مهال له بل موټر سره ټکر کړی و.
د امریکا د جورجیا د ایالتي پولیسو د راپور له مخې، دغه پېښه د تېرې اپریل میاشتې پر ۲۳مه نېټه هغه مهال وشوه چې تورن کواډرامیل ویلیامز د پولیسو له اشارې وروسته د تېښتې هڅه وکړه او له بل موټر سره یې ټکر وکړ.
د محکمې د اسنادو له مخې، کواډرامیل ویلیامز د جولای میاشتې پر اتمه نېټه د قتل په دوو جرمي مواردو، له پولیسو څخه په تېښته او د ميتامفیتامین د وئشلو د نیت په تور تورن شوی دی.
په دې ترافیکي پېښه کې ۳۶ کلن افغان خبریال حبیب الله عزیزي او ۱۸ کلن تریجون انتوني وژل شوي دي. انتوني له موټر څخه بهر لوېدلی و او عزیزي روغتون ته له لېږدول کېدو وروسته د سختو ټپونو له امله ساه ورکړه.
اسناد ښيي چې تورن ویلیامز پر سړک له ټاکل شوي سرعت څخه په ساعت کې شاوخوا ۲۰ مایله زیات سرعت درلود او د درېدو د غږیزو او نورو اشارو له ورکولو وروسته هم ونه درېد.
حبیب الله عزیزي چې په دې پېښه کې یې ژوند له لاسه ورکړی، په یوه خیریه انلاین پاڼه کې د یوه افغان عکاس خبریال په توګه معرفي شوی چې په ساوانا ښار کې یې ژوند کاوه.
د محکمې د اسنادو پر بنسټ، پولیسو د تورن کواډرامیل ویلیامز له موټر څخه ميتامفیتامین مخدره توکي هم ترلاسه کړي دي او نوموړی اوسمهال په بند کې دی.
حبیب الله عزیزي له یوې لسیزې زیاته موده په افغانستان کې له طلوع نیوز سره د کامره مین په توګه کار کړی و او د جمهوریت له پرځېدو وروسته هغه امریکا ته کډوال شوی و.
