د هېلوټرسټ په نوم د ماین پاکۍ موسسې د کندهار په شاوليکوټ ولسوالۍ کې یو ۵۰۰ کیلوګرامه بم کشف او شنډ کړی دی.د طالبانو له پېښو سره د مبارزې چمتووالي اداره وايي، دغه بم له تېرو جګړو پاتې شوی وو. د ۲۰۲۶ کال له پیل راهیسې د ماینونو د چاودنو له امله ۳۰ کسان مړه او ۷۰ نور ټپيان شوي دي.
د طالبانو له پېښو سره د مبارزې چمتووالي ادارې د چهارشنبې په ورځ (د چنګاښ ۲۴مه) د یوې خبرپاڼې په خپرولو سره ویلي، د هېلوټرسټ د ماین پاکۍ موسسې د چټک غبرګون ټیم د کندهار د شاولیکوټ ولسوالۍ د ویاند کلي په یوې سیمه کې له تېرو جګړو پاتې شویو اېفاېبي ۵۰۰ کیلویي بمب کشف او په خوندي ډول یې شنډ کړ.
دغې ادارې له ټولو هېوادوالو غوښتنه کړې، چې د هر ډول ناچاوده، چاودېدونکو او شکمنو توکو د لیدلو په صورت کې دې له لاس وروړلو او نږدې کېدو څخه ډډه وکړي او ژر تر ژره دې اړوندو امنیتي او مسوولو ادارو ته خبر ورکړي، څو لازم اقدامات ترسره شي.
د طالبانو له پېښو سره د مبارزې چمتووالي ادارې تر دې مخکې ویلي وو، چې د ۲۰۲۶ کال له پیل راهیسې په هېواد کې د ماینونو او ناچاودو توکو ۴۹ پېښې رامنځته شوي او له امله یې ۳۰ کسان مړه او ۷۰ نور ټپيان شوي او په دې موده کې د همکارو بنسټونو په همکارۍ ۲۲ کیلومتره مربع سیمه له ماینونو او ناچاودو توکو پاکه شوې ده.
یادې ادارې زیاته کې وه، چې لا هم ۱۰۱۹ کیلومتره مربع سیمې د ماینونو او ناچاودو توکو له ککړتیا سره مخ دي او پاکول یې اړین دي.
