د نورستان پخوانی والي: پوهنتونونه د ملت علمي پانګه ده، د له منځه وړلو پر ځای دې پیاوړي شي

د طالبانو د لوړو زده‌کړو وزارت ویاند ضیاءالله هاشمي د پخواني ولسمشر حامد کرزي د هغو څرګندونو په غبرګون کې چې د نجونو او هلکانو پر زده‌کړو یې ټینګار کړی و، ویلي: «د لوړو زده‌کړو د چارو په اړه نظر ورکول له هغو کسانو سره ښه ښایي چې د خپلې واکمنۍ پر مهال یې د ملک د پرمختګ لپاره عملي او مثبت میراث پرې ایښی وي».

دغه طالب چارواکي په کلکه حامد کرزي ته په خطاب کې پر اېکس پاڼه لیکلي:« ته د افغانستان د مسایلو په اړه د نظر ورکولو حق نه لرې. افغانستان ته دې ښه تاریخ نه دی پرې ایښی».

یاد طالب چارواکي دغه غبرګون وروسته له هغه ښودلی چې د افغانستان پخواني ولسمشر حامد کرزي د چهارشنبې په ورځ په هېواد کې د ماشومانو د خوارځواکۍ د مخنیوي لپاره د ټولو نجونو او هلکانو پر عمومي زده‌کړو ټینګار وکړ.

ښاغلي کرزي د یونېسف راپور ته په اشارې، چې ۳،۷ میلیونه افغان ماشومان له خوارځواکۍ سره مخ دي، پر خپل اېکس لیکلي وو چې د بې‌سوادۍ له منځه وړل او د مسلکي بشري ځواک روزنه د ټولنې د ستونزو د حل یوازینۍ لاره ده.
طالبانو په تېرو نږدې پنځو کلونو کې د نجونو پر وړاندې د شپږم ټولګي څخه پورته د ښوونځیو او پوهنتونونو دروازې تړلې دي. که څه هم حامد کرزي په خپلو خبرو کې په مستقیم ډول د طالبانو د بندیزونو نوم نه و اخیستی او یوازې یې د خوارځواکۍ د مهارولو لپاره زده‌کړې یو اصل ګڼلی و، خو د طالبانو د لوړو زده‌کړو وزارت ویاند دغه څرګندونې د خپلې تګلارې پر وړاندې نیوکه بللې او په شخصي برید سره یې د پخواني ولسمشر د نظر ورکولو حق رد کړی دی.

په افغانستان کې د اروپایې ټولنې استازولی پر خپل اېکس لیکلي، له افغانان ځوانانو سره د زده کړو او مسلکي روزنې له لارې مرسته کوي، څو مهارتونه ترلاسه کړي، سوداګرۍ پیل کړي او دوامدار معیشت رامنځته کړي.

یادې ټولنې زیاته کړې چې د دغو پروګرامونو موخه دا ده څو نجونې او هلکان وکولای شي پرمختګ وکړي او د خپلو ټولنو په ملاتړ او پرمختګ کې ونډه واخلي.

د ځوانانو د مهارتونو نړیواله ورځ هر کال د جولای په ۱۵مه د ملګرو ملتونو له لوري نمانځل کېږي. د دې ورځې موخه ځوانانو ته د تخنیکي، مسلکي او کاري مهارتونو د ارزښت څرګندول او د کارموندنې، کار جوړونې او دوامدار پرمختګ لپاره د هغوی د وړتیاوو پیاوړتیا ده.

د طالبانو دبهرنیو چارو وزرات د خبرپاڼې له مخې د دې سفر په لړ کې متقي د قطر دولت د بهرنیو چارو له وزیر شیخ محمد بن عبدالرحمن ال ثاني، د دفاع له وزیر، شیخ سعود بن عبدالرحمن بن حسن ال ثاني، او همدارنګه د قطر د بهرنیو چارو وزارت د دولت له وزیر ډاکټر محمد بن عبدالعزیز الخليفي، سره لیدلي دي.

د طالبانو د بهرنیو چارو وزرات ویلي دغو لیدنو پر مهال نوموړي یادو قطري چارواکو ته د قطر د پخواني امیر د مړینې له امله د طالبانو د مشرتابه له لوري د خواخوږۍ، تسلیت او ډاډګېرنې مراتب وړاندې کړي دي.

خو د قطر د پخواني امیر د خاورو سپارلو او جنازې په مراسمو کې هېڅ طالب چارواکي شتون نه درلود.

قطر د ۲۰۲۱ کال د اګست له بدلون وروسته د طالبانو له مهمو سیمه‌ییزو شریکانو څخه ګڼل کېږي او ددغې ډلې سیاسي دفتر له ۲۰۱۳ کال راهیسې په دوحه کې فعالیت لري همدارنګه د امریکا او طالبانو ترمنځ د ۲۰۲۰ کال د دوحې هوکړه هم په همدې هېواد کې لاسلیک شوه.

په کراچۍ کې د طالبانو قنسول عبدالجبار تخاري د چهارشنبې په ورځ په یوه ویډیویي پیغام کې وویل، په سند ایالت کې د افغان محصلینو د ویزو موده پای ته رسېدلې خو تر اوسه له کومې جدي ستونزې سره نه دي مخ شوي. خو نوموړي زیاته کړه چې د پاکستان په نورو ایالتونو کې افغان محصلین د قانوني ویزو د نشتوالي له امله د نیول کېدو او ایستل کېدو له ګواښ سره مخ دي ځکه د پاکستان حکومت د هغوی ویزې نه دي تمدید کړې.

د دغه وضعیت په دوام، په پاکستان کې سرچینو افغانستان انټرنشنل ته تایید کړې چې پولیسو په پنجاب ایالت کې ۱۳ افغان ډاکټران او یو د طب پوهنځي محصل نیولي او د ایستلو مرکز ته یې لېږدولي دي. د معلوماتو له مخې، دغو کسانو شاوخوا یو کال وړاندې د خپلو ویزو د تمدید غوښتنه کړې وه، خو د پاکستاني چارواکو له لوري ورته هېڅ ځواب نه و ورکړل شوی. د طالبانو د کډوالو وزارت هم تېره اونۍ ویلي و چې پاکستان یو شمېر افغان ډاکټران تر بند وروسته افغانستان ته شړلي دي.

دا په داسې حال کې ده چې د ملګرو ملتونو د کډوالو عالي کمېشنرۍ د پاکستان د کورنیو چارو وزارت له پرېکړې وروسته له دغه هېواده غوښتي چې له خطر سره د مخ افغانانو له شړلو ډډه وکړي. نړیوالو سازمانونو په وار وار خبرداری ورکړی چې افغانستان ته د پخواني حکومت د سرتېرو، خبریالانو، فعالانو او هغو خلکو ستنول خوندي نه دي چې ژوند یې تر ګواښ لاندې دی.

ځايي سرچینو د چهارشنبې په ورځ افغانستان انټرنشنل ته وویل، چې د طالبانو استخباراتي ځواکونو په پوځي موټرو کې د فیروزکوه ښار په اتوس سفلا کلي کې پر کورونو او د خلکو پر کارځایونو چاپه وهلي او شاوخوا ۱۳ تنه یې له ځان سره بیولي دي. د سرچینو په وینا، په نیول شویو کسانو کې لږ تر لږه درې تنه د تېر جمهوري نظام مامورین دي چې د کرنې، کار او ټولنیزو چارو او ملي بانک په ریاستونو کې یې دندې لرلې او له خپلو کارځایونو څخه نیول شوي دي.

په ورته مهال د زرغون بهیر سیاسي غورځنګ په یوه اعلامیه کې ویلي چې طالبانو په غور کې لسګونه ځوانان د دغه بهیر په «شنه قطعه" کې د غړیتوب په تور نیولي دي. خو زرغون بهیر په رسمي ډول د دغو نیول شویو کسانو غړیتوب نه دی تایید کړی او ویلي یې دي چې د طالبانو دا جنایت تر څار لاندې لري. بل خوا، د غور شاوخوا ۲۰ تنو قومي مشرانو د طالبانو له والي سره لیدلي او د دغو کسانو د خوشې کولو غوښتنه یې کړې، خو د طالبانو ځايي چارواکو د هغوی له نیول کېدو بې‌خبري ښودلې ده.

د ځايي سرچینو د معلوماتو له مخې،زرغون بهیر څه موده وړاندې د غور په دولت‌یار ولسوالۍ کې د طالبانو پر یوې پوستې راکټي برید کړی و چې په پایله کې یې بریدګر وتښتېدل او طالبانو اوس د غبرګون په توګه د دغه بهیر د پخوانیو غړو پر نیولو لاس پورې کړی دی. زرغون بهیر د چنګاښ په ۱۷مه په یوې ویډیو کې د دغه برید د مسوولیت اخیستو خبر ورکړی و. طالبانو تر اوسه په رسمي ډول د دغو نیونو په اړه څه نه دي ویلي او د نیول شویو کسانو کورنۍ د هغوی د برخلیک په اړه سختې اندېښمنې دي.