د پاکستان د ولسمشر ویاند مرتضی سولنګي وایي، اسلاماباد له افغانستان سره د متقابل درناوي پر بنسټ د سوله ییزو او باثباته اړیکو غوښتونکی دی. خو نوموړي ټینګار کړی چې د افغانستان له خاورې د ترهګرۍ ګواښ لا هم د پاکستان اصلي اندېښنه ده.
د پاکستان د ولسمشر اصف علي زرداري ویاند مرتضی سولنګي د چهارشنبې په ورځ د «پاکستان په یوه داسې جیوپولیټیک چاپیریال کې چې د بدلون په حال کې دی» تر سرلیک لاندې کنفرانس کې د سیمې د بدلونونو، له افغانستان سره د اړیکو او د خپل هېواد د امنیتي ننګونو په اړه وینا وکړه. سولنګي په دغه ناسته کې وویل: «د پاکستان اصلي اندېښنه لا هم له پولې اخوا ترهګري ده چې د افغانستان له خاورې سرچینه اخلي او زموږ د ملکي وګړو او امنیتي منسوبینو لپاره مستقیم ګواښ دی.»
مرتضي سولنګي دغه راز د چین، قطر، سعودي عربستان، ترکیې او متحده عربي اماراتو د هغو منځګړیتوبونو او هڅو هرکلی وکړ چې د پاکستان او طالبانو ترمنځ د تلپاتې امنیتي تفاهم د رامنځته کولو لپاره یې د خبرو اترو اسانتیاوې برابرې کړې دي. دغه پاکستاني چارواکي ټینګار وکړ چې د ترهګرۍ پر وړاندې د مبارزې، د پولو د مدیریت او د کډوالو د بېرته ستنېدو په برخو کې د همکارۍ لپاره د حقیقي او عملي چوکاټونو جوړول اړین دي.
اسلاماباد په ځانګړي ډول په افغانستان کې د طالبانو له بیا واکمنېدو وروسته، په وار وار په خپل هېواد کې د وسلهوالو بریدونو او ناامنیو د زیاتېدو په اړه اندېښنه ښودلې او طالبان یې د ټيټيپي غړو ته په پناه ورکولو او له هند سره په همکارۍ تورن کړي دي. خو طالبانو دا تورونه تل رد کړي او ټینګار کوي چې هېچا ته اجازه نه ورکوي چې د افغانستان خاوره د بل هېواد په زیان وکاروي. د دواړو لورو ترمنځ کړکېچ په تېر کال کې زیات شوی چې کله ناکله په مرګونو نښتو، هوايي بریدونو او سرحدي جګړو هم اوښتی دی.
