د اروپايي ټولنې او طالبانو ترمنځ د تعامل د پراخېدو په اړه په خپور شوي تحلیلي راپور کې راغلي، چې بروکسل د افغانستان په اړه په خپلې تګلارې کې عملي بدلون ته مخه کړې او هڅه کوي د کډوالو، کونسلګریزو خدمتونو او اوږدمهاله اړیکو په برخه کې له طالبانو سره همکاري پراخه کړي.
د شاهي متحده خدمتونو انسټیټیوټ لوړپوړی څېړونکی انتونیو ګیوستوزي په یوه تحلیلي راپور کې ویلي، د طالبانو یوه پلاوي په وروستیو کې بروکسل ته سفر کړی او د اروپايي ټولنې له چارواکو سره یې د هغو افغان کډوالو د بېرته ستنولو پر موضوع خبرې کړې چې په ناقانونه توګه په اروپا کې ژوند کوي.
هغه زیاتوي، طالبانو د دغه کډوالو د بېرته منلو په بدل کې په اروپا کې دوی ته د افغانستان د کونسلګریو سپارلو غوښتنه کړې، هغه اقدام چې که څه هم د طالبانو رسميت پېژندنه نه بلل کېږي؛ خو د دواړه خواوو د اړیکو عادي کېدو یو مهم ګام ګڼل کېږي.
د هغه په وینا؛ اروپايي ټولنې له ۲۰۲۲کال راهیسې په کابل کې خپل استازیتوب بېرته فعال کړی او اروپايي ډیپلوماتانو په دوحه او متحده عربي اماراتو کې له طالب استازو سره څو ځلې نارسمي لیدنې کړې دي.
په راپور کې راغلي، چې یوازې د ناقانونه افغان کډوالو موضوع نه؛ بلکې په اروپا کې سلګونه زره افغانانو ته د کونسلګریزو خدمتونو نشتوالی هم د اروپايي هېوادونو لپاره جدي ستونزه ګرځېدلې ده. د راپور له مخې؛ د ۲۰۲۵کال تر پایه په جرمني کې شاوخوا ۴۴۹زره او په فرانسه کې له ۱۰۰زرو ډېر افغانان ثبت شوي دي.
هغه وایي، د کونسلګریزو خدمتونو د نشتوالي له امله د جعلي اسنادو کارول زیات شوي او دغه وضعیت د اروپايي هېوادونو د کډوالۍ چارې هم پېچلې کړې دي. د راپور له مخې؛ جرمني د اروپايي ټولنې په دریځ کې مهم بدلون راوستی دی. دغه هېواد د ۲۰۲۴کال په اګست میاشت کې افغانستان ته د افغانانو د بېرته ستنولو بهیر پیل کړ او وروسته یې په برلین کې د افغانستان سفارت او په بن ښار کې کونسلګري طالبانو ته وسپارله.
راپور زیاتوي، اروپايي ټولنه لاهم هڅه کوي چې د ښځو د حقونو، بشري حقونو او ټولګډونه حکومت په څېر موضوعات له طالبانو سره د خبرو برخه کړي؛ خو ورته مهال د کډوالۍ د فشارونو له امله له طالبانو سره تعامل ته عملي اړتیا هم لري.
د راپور له مخې؛ د اروپايي هېوادونو لپاره د اوسني وضعیت دوام نور د پلی کېدو وړ نهدی او د طالبانو له ادارې سره له محدود تعامل پرته بله اسانه بدیله لاره نه تر سترګو کېږي.
