د امریکا سفارت په بحرین کې د ایران د احتمالي برید خبرداری ورکړ

سېنټکام په یوه خبرپاڼه کې ویلي، دا عملیات د نهمې پرله‌پسې شپې لپاره دوام لري او موخه یې د ایران د هغو پوځي وړتیاوو لا کمزوري کول دي چې د دې قوماندانۍ په وینا، د هرمز تنګي له لارې د تېرېدونکو سوداګریزو بېړیو او ملکي سمندري تګ راتګ د نښه کولو لپاره کارول کېږي.

د امریکا مرکزي قوماندانۍ ویلي، دا بریدونه د هغو پوځي تاسیساتو او ظرفیتونو پر ضد ترسره کېږي چې د سیمې د سمندري امنیت لپاره ګواښ بلل کېږي، خو د بریدونو د ځایونو، د زیانونو او احتمالي تلفاتو په اړه یې نور جزئیات نه دي ورکړي.

په همدې حال کې، د ایران د بېلابېلو ښارونو اوسېدونکو د چاودنو د غږونو د اورېدو خبر ورکړی دی. د ټولنیزو رسنیو او ځینو ایراني رسنیو د راپورونو له مخې، په یو شمېر سیمو کې د چاودنو غږونه اورېدل شوي، خو د دغو پېښو د کره ځایونو او لاملونو په اړه لا هم رسمي معلومات نه دي خپاره شوي.

ایراني چارواکو تر اوسه د سېنټکام د دغو تازه بریدونو او د چاودنو د راپورونو په اړه رسمي غبرګون نه دی ښودلی.

دا بریدونه داسې مهال دوام لري چې د امریکا او ایران ترمنځ پوځي ترینګلتیا لا هم لوړه ده او په سیمه کې د امنیتي وضعیت د لا خرابېدو په اړه اندېښنې زیاتې شوې دي.

د سپاه پاسداران اړوند تسنیم خبري اژانس ویلي چې د ماهشهر بندر او بندر امام په شاوخوا کې د څو چاودنو غږونه اورېدل شوي، خو د دغو چاودنو د لامل، احتمالي زیانونو او یا تلفاتو په اړه یې نور جزئیات نه دي ورکړي.

بل لور ته، مهر خبري اژانس د خپل خبریال له قوله راپور ورکړی چې د ایران د وسله‌والو ځواکونو هوايي دفاعي سیسټم د هېواد په سوېل کې یوه «متخاصمه» بې‌پیلوټه الوتکه نسکوره کړې ده.

تر اوسه هېڅ ایراني رسمي چارواکي دا نه دي تایید کړي چې ایا په خوزستان کې د اورېدل شویو چاودنو او د یادې بې‌پیلوټه الوتکې د نسکورېدو ترمنځ اړیکه شته که نه.

همدارنګه، د دغې بې‌پیلوټه الوتکې د کره موقعیت، هویت او د پېښې د نورو جزییاتو په اړه هم رسمي معلومات نه دي خپاره شوي.

دا راپورونه داسې مهال خپرېږي چې په سیمه کې امنیتي وضعیت لا هم ترینګلی دی او د ایران په بېلابېلو سیمو کې د احتمالي امنیتي پېښو په اړه اندېښنې دوام لري.

سېنټکام د یکشنبې په ورځ، د چنګاښ په ۲۸مه، په یوه خبرپاڼه کې ویلي چې دا پېښه د چنګاښ په ۲۷مه هغه مهال رامنځته شوه، کله چې امریکايي ځواکونه د ایران د یوې راغورځول شوې بې‌پیلوټه الوتکې پاتې ناچاودېدلي مهمات په کنټرول شوې بڼه شنډول.

د خبرپاڼې له مخې، ټپي شوی سرتېری لږ ټپي شوی او دا مهال تر درملنې لاندې دی.

سېنټکام همداراز ویلي، امریکايي ځواکونو د پراخو پلټنو وروسته د یکشنبې په ورځ په اردن کې د ایران د چنګاښ د ۲۶مې د برید په ځای کې د یوه ناپېژندل شوي انسان پاتې شوني موندلي دي.

د یادې قوماندانۍ په وینا، د دغو پاتې شونو د هویت د تثبیت لپاره څېړنې روانې دي.

سېنټکام تر دې مخکې اعلان کړی و چې پر اردن د ایران د چنګاښ د ۲۶مې په برید کې دوه امریکايي سرتېري وژل شوي او یو بل نادرکه شوی دی.

دغه بنسټ ویلي، د وژل شویو او نادرکه شویو سرتېرو د کورنیو د خبرولو تر بشپړېدو پورې به د هغوی د هویت په ګډون نور جزئیات خپاره نه کړي.

د کویټ د دفاع وزارت په رسمي اېکس‌پاڼه کې په خپره شوې خبرپاڼه کې راغلي چې د هېواد هوايي دفاعي سیستمونو دغه توغندي او بې‌پیلوټه الوتکې د کویټ هوايي حریم ته له ننوتلو وروسته کشف او له منځه وړي دي.

وزارت په دې خبرپاڼه کې ادعا کړې چې د ایران اسلامي جمهوریت د کویټ د برېښنا وزارت پر تاسیساتو بریدونه کړي چې له امله یې پراخه اورلګېدنه رامنځته شوې ده.

د خبرپاڼې له مخې، په دغو بریدونو کې د کویټ ملکي تاسیسات او حیاتي زېربناوې هم په نښه شوې دي.

د کویټ د دفاع وزارت د بریدونو د احتمالي مرګ‌ژوبلې یا مالي زیانونو په اړه نور جزئیات نه دي خپاره کړي.

دغه ادعاوې په داسې حال کې مطرح کېږي چې په سیمه کې د ایران او امریکا ترمنځ کړکېچ زیات شوی او د احتمالي پوځي نښتو د پراخېدو په اړه اندېښنې هم مخ په ډېرېدو دي. تر اوسه د ایران چارواکو د کویټ د دفاع وزارت د دغو ادعاوو په اړه څه نه دي ویلي.

د امریکا د بهرنیو چارو وزارت په خپره کړې خبرپاڼه کې ویلي، دواړو لوریو د لبنان او اسراییل ترمنځ د خبرو د درې اړخیز چوکاټ د عملي کېدو پر څرنګوالي بحث وکړ.

د خبرپاڼې له مخې، مارکو روبیو په دې لیدنه کې د یاد چوکاټ د بریالي پلي کېدو لپاره د متحده ایالاتو پر ژمنتیا ټینګار کړی او ویلي یې دي چې واشنګټن به د دې بهیر ملاتړ ته دوام ورکړي.

د امریکا د بهرنیو چارو وزارت د دواړو چارواکو د خبرو نور جزئیات نه دي خپاره کړي، خو ویلي یې دي چې د سیمې ثبات او د هوکړو عملي کېدل د دواړو لوریو د بحث مهمې برخې وې.

دغه لیدنه داسې مهال شوې چې امریکا د لبنان او اسراییل ترمنځ د امنیتي او سرحدي تفاهماتو د عملي کېدو په برخه کې د ملاتړ پر دوام ټینګار کوي.