د افغانستان په ختیځ نورستان ولایت کې د دوشنبې ورځې له غرمې وروسته سخت سېلابونه راوتلي چې د طالب چارواکو په وینا، لږ تر لږه ۲۰کسان په کې مړه شوي، شاوخوا ۸۰کسان ټپیان دي او له ۱۰۰څخه ډېر نور نادرکه دي.
د طالبانو د پېښو پر وړاندې د چمتووالي ادارې ویاند، یوسف حماد ویلي، سېلابونو د نورستان د مرکز پارون په ګډون د ولایت بېلابېلې سیمې ځپلې او ځایي اوسېدونکو ته یې پراخ ځاني او مالي زیانونه اړولي دي.
حماد زیاته کړې چې دا شمېرې لومړنۍ دي او ښايي د مړو او نادرکه کسانو شمېر نور هم لوړ شي.
بلخوا، د نورستان لپاره د طالبانو د والي دفتر هم د دې پېښې پخلی کړی او ویلي یې دي چې په ځینو سیمو کې سېلابونه تر شپږو ساعتونو پورې روان وو، چې له امله یې خلکو ته درانه ځاني او مالي زیانونه اوښتي دي.
تر اوسه د استوګنیزو کورونو، عامه بنسټیزو تاسیساتو د زیانونو او همدارنګه د لټون او ژغورنې د عملیاتو په اړه نور جزییات نه دي خپاره شوي.
بل لورته په نورستان کې ځايي سرچینو افغانستان انټرنشنل – پښتو ته ویلي، چې د دغه ولایت په مرکز پارون کې په وروستیو سېلابونو کې د ۴۳ لادرکه شویو کسانو جسدونه موندل شوي دي.
سرچینې زیاتوي په موندل شویو کسانو کې د پارون د ښاروال په ګډون د ځینو نورو طالبانو جسدونه هم شامل دي.
افغانستان د هغو هېوادونو له ډلې څخه دی چې د طبیعي پېښو، په ځانګړي ډول سېلابونو، پر وړاندې ډېر زیانمن ګڼل کېږي. د روان کال په پیل کې هم د هېواد په بېلابېلو ولایتونو کې سېلابونو لسګونه کسان مړه او ګڼ مالي زیانونه یې اړولي وو.
