د هند د بهرنیو چارو وزارت ویاند رندهیر جیسوال ویلي، هېواد یې د نورستان د مرګونو سېلابونو له امله د زیانمنو شویو کورنیو د ملاتړ په موخه د خوراکي توکو او خېمو یوه بشري مرستندویه جوپه د طالبانو د پېښو پر وړاندې د چمتووالي ادارې ته سپارلې ده.
جیسوال زیاته کړې چې هند په دې سخت وخت کې د افغانستان د خلکو ترڅنګ ولاړ دی.
د طالبانو د کندهار والي د افغانستان لپاره د نړیوال بانک له مشر فاریس هداد زیروس او د ملګرو ملتونو د کرنې او خوړو سازمان له مسوول سره په کتنه کې د دهلې بند د لوړولو، د سړو خونو د جوړولو او د مېوو لپاره د بازار موندنې په برخو کې د نړیوال بانک د مرستو غوښتنه کړې ده.
د طالبانو د کندهار والي رسنیز دفتر نن سې شنبه، د چنګاښ پر ۳۰مه په اېکس کې لیکلي، چې په دې لیدنه کې د نړیوال بانک ګروپ مشر فاریس هداد زیروس په افغانستان کې د دغه بانک او د ملګرو ملتونو د خوړو او کرنې سازمان د فعالیتونو په اړه معلومات شریک کړل.
هغه ویلي، چې نړیوال بانک د طالبانو تر واکمنۍ لاندې په هېواد کې خپلو چارو ته دوام ورکړی او د خوړو او کرنې سازمان ټولې مالي چارې هم د دغه بانک له لوري تمویلېږي، چې د روغتیا، بشري مرستو، پوهنې، پاکو اوبو او زراعت په برخو کې فعالیت کوي.
طالبانو د نړیوال بانک د افغانستان د برخې د مشر له قوله ویلي، چې دوی له سیمهييزو چارواکو سره په ګډه هڅې پیل کړې دي څو د خصوصي سکتور د پیاوړتیا او خلکو ته د کاري زمینو برابرولو په برخو کې ځانګړې پروژې پلې کړي.
د طالبانو د کندهار والي د نړیوال بانک او د خوړو او کرنې سازمان د مرستو د ستاینې ترڅنګ غوښتي، چې د دهلې بند د دېوالونو لوړولو، د میرویس حوزوي روغتون د دوامداره ملاتړ او د سړو خونو د جوړولو په برخو کې اساسي پروژې پلي شي.
د طالبانو کندهار والي همدارنګه د چیکډېمونو جوړولو، د وچې او تازه مېوې لپاره د بازار موندنې او د نشهيي توکو د بدیل کښت په برخه کې د مرستو غوښتنه کړې ده.
ملا محمد شیرین اخند زیاته کړې چې افغانان له کلونو سختیو وروسته اوس په داسې حالت کې دي چې باید ورته اساسي او معیاري خدمات وړاندې شي.
د طالبانو تر کنټرول لاندې د افغاني سرې میاشتې ټولنه وايي، د نورستان د سېلاب ځپلو کورنیو ته د بېړنیو مرستو د رسولو لپاره یې له نړۍالو مرستندویانو سره د همغږۍ ګډه ناسته کړې او د قربانیانو کورنیو ته د بېړنیو مرستو په برخه کې یې د زیاتې همکارۍ غوښتنه کړې ده.
د طالبانو تر کنټرول لاندې افغاني سرې میاشتې ادارې ویلي چې د یادې ادارې مرستیال روح الله عبدالسلام د سېشنبې په ورځ، د نورستان سېلاب ځپلو کورنیو ته د بېړنیو مرستو چمتو کولو په موخه د نړۍوالې سره صلیب کمېټې، د سره صلیب او سرې میاشتې د ټولنو نړۍوال فدراسیون، د ترکیې او قطر د سرې میاشتې او په افغانستان کې د ډنمارک او ناروې د سره صلیب له استازو سره ناسته کړې ده.
طالبانو ویلي، چې له خپله اړخه یې نورستان ته د مرستو رسولو لړۍ پیل کړې ده، خو د نړۍوالو مرستندویانو همکاري هم اړینه ده.
د طالبانو تر کنټرول لاندې د افغاني سرې میاشتې مرستیال له مرستندویانو غوښتي چې د لومړنیو مرستو، درملو، چمتو خوړو، د څښاک پاکو اوبو او نورو بشري مرستو په چمتو کولو کې دې ورسره همکاري وکړي.
طالبانو ویلي، چې د همغږۍ په یاده ناسته کې نړۍوالو مرستندویانو ژمنه کړې چې د نورستان د سېلاب ځپلو کورنیو د بېړنیو اړتیاوو د پوره کولو لپاره به د درملو، روغتیايي تجهیزاتو، خوراکي او غیر خوراکي توکو او اړینو بشري مرستو په برابرولو کې خپلې همکارۍ پراخې کړي.
دا په داسې حال کې ده، چې تېره ورځ د نورستان په مرکز پارون ښار کې سختو سېلابونو خلکو ته سخت مالي او ځاني زیانونه واړول. طالبانو د یادو سېلابونو له امله د ۲۳ کسانو د مړینې پخلی کړی او وايي شاوخوا سل تنه نور لا هم لادرکه دي.
د طالبانو دفاع وزارت وايي، چې په کابل کې د شهید سردار محمد داود خان په ۴۰۰ بستریز روغتون کې په لومړي ځل د یو څلور کلن ماشوم د زړه پېچلی عملیات په بریالیتوب وشو. یاد وزارت ویلي، چې دغه ماشوم د زړه له یوې پېچلې ناروغۍ کړېده، چې د ډاکټرانو په هڅو یې بشپړه درملنه وشوه.
د طالبانو د دفاع وزارت په اېکس کې لیکلي، چې نن سې شنبه، د چنګاښ پر ۳۰مه د سردار محمد داود خان د کمپلکس ۴۰۰ بستریز روغتون د زړه د جراحي په مرکز کې د دغه څلور کلن ناروغ ماشوم د زړه عملیات په بریالیتوب سره ترسره شول.
د وزارت په وینا، دغه ماشوم د زړه له یوې پېچلې ناروغۍ څخه کړېده، چې د ډاکټرانو په هڅو یې روغتیايي حالت اوس ښه شوی دی.
د دغه روغتون ډاکټرانو او متخصصانو ویلي چې د دغه پېچلي عملیات په ترسره کولو سره یې د ماشوم د زړه ستونزه په بشپړه توګه حل کړې ده.
هغوی تایید کړې چې د دغه ډول پېچلو عملیاتو کول په هېواد کې دننه د زړه د ناروغانو د درملنې په برخه کې یو مهم پرمختګ دی.
د دغه مرکز متخصصانو تر اوسه پورې د زړه د بېلابېلو پېچلو ناروغیو د درملنې لپاره په ټولیزه توګه ۶۰ د زړه پرانېستي عملیات کړي دي.
د عزیزي انرژۍ ګروپ رییس د طالبانو د ریاست الوزرا د اقتصادي مرستیال سره په لیدنه کې ویلي چې د لس زره مېګاواټه برېښنا د تولید لپاره یې ټول تخنیکي وسایل پېرلي او ډېر ژر به یې افغانستان ته انتقال کړي.
د طالبانو د ریاست الوزرا اقتصادي معاونیت د سېشنبې په ورځ د یوې خبرپاڼې په خپرولو سره ویلي، چې ملا عبدالغني برادر د عزیزي ګروپ له رییس عزیزي او تخنیکي ډلې سره د لیدنې پرمهال د لس زره مېګاواټه برېښنا د تولید پروژې د پرمختګونو په اړه خبرې کړې دي.
میرویس عزیزي ویلي، چې د لس زره مېګاواټه برېښنا د تولید تخنیکي وسایل به ډېر ژر افغانستان ته انتقال کړي او همدارنګه طالبانو ته یې ډاډ ورکړی چې ډېر ژر به په هېواد کې د سرطاني ناروغیو د درملنې د روغتونونو جوړولو چارې هم پیل کړي.
په یاده ناسته کې د طالبانو او عزیزي ګروپ ګډې تخنیکي کمیټې ویلي، چې د کابل ولایت په نغلو او د پروان په باریکاباد کې د ۱۰۰ـ ۱۰۰ مېګاواټه او په غزني کې د ۱۳۰ مېګاواټه لمریزې برېښنا پروژو امکان سنجي او مطالعات بشپړ او د برېښنا د پېر تړونونه یې لاسلیک شوي.
همدارنګه یادې کمیټې ویلي، چې په تخار کې د ډبرو سکرو څخه د ۱۶۵ او بغلان کې د ۳۵۰ مېګاواټه برېښنا په اړه یې د امکان سنجۍ چارې دوام لري.
ملا عبدالغني برادر د یادې لیدني پر مهال د عزیزي ګروپ مسوولانو ته د همکارۍ ډاډ ورکړی او غوښتنه یې کړې چې د برېښنا د تولید چارې په ټاکلي موده کې بشپړي کړي.
میرویس عزیزي شاوخوا یو کال وړاندې له طالبانو سره د افغانستان په بېلابېلو ولایتونو کې د لس زره مېګاواټه برېښنا د تولید په برخه کې هوکړه لاسلیک کړه، خو لا هم د یادې پروژې د چارو د پیل کوم څرک نه لېدل کېږي.
ملګرو ملتونو، بریتانیا، جاپان، ترکیې او سعودي عربستان د نورستان د سېلابونو له قربانیانو سره خواخوږي څرګنده کړې. یاد سازمان او هېوادونو د ورکو شویو کسانو د موندلو هیله څرګنده کړې او د اغېزمنو خلکو د ملاتړ او ژغورنې د عملیاتو پر دوام یې ټینګار کړی.
په افغانستان کې د ملګرو ملتونو د سرمنشي ځانګړي استازي مرستیال برونو لیمارکوي ویلي، د هغو کورنیو او ټولنو ترڅنګ ولاړ دی چې د افغانستان په ختیځ کې د وروستیو سېلابونو له امله یې خپل عزیزان له لاسه ورکړي دي.
په ورته وخت کې، د افغانستان لپاره د بریتانیا ځانګړي استازي ریچارډ لېنډسي هم د خواشینۍ تر څنګ ویلي چې فکرونه یې له اغېزمنو خلکو، د قربانیانو له کورنیو او هغو بیړنیو ژغورونکو ډلو سره دي چې د لټون او ژغورنې عملیات پر مخ وړي.
تر دې وړاندې، په افغانستان کې د جاپان سفیر ماساموتو هم د نورستان د سېلابونو له امله د قربانیانو له کورنیو سره خواخوږي ښودلې وه.
همداراز، د ترکیې سفارت هم پر خپل ایکس پاڼې خواخوږي څرګنده کړې ده.
د سعودي عربستان سفارت هم دخواخوږۍ تر څنګ ويلي چې دوی د افغانستان له ولس سره ولاړ دي.
د نورستان ولایت د مرکز پارون کې دوه ورځې وړاندې د سختو بارانونو له امله ویجاړوونکي سېلابونه راوتلي وو چې د طالبانو د پېښو پر وړاندې د چمتووالي ادارې په وینا، په دې پېښه کې د مړو شمېر ۲۳ ته رسېدلی، د ۱۵ کسانو جسدونه موندل شوي او له ۱۰۰ څخه ډېر کسان لا هم ورک دي او د ژغورنې او لټون عملیات لا هم روان دي.