د عوامي نشنل ګوند د خیبر پښتونخوا څانګې مشر میا افتخار ویلي، د سیمې خلک له تېرو پنځوسو کلونو راهیسې پوهېږي چې په افغانستان او سیمه کې روانه جګړه تصادفي نهده؛ بلکې د منظم کاروبار، د لویو قدرتونو د لاسوهنو او شخصي ګټو له امله دوام لري.
هغه وویل، په افغانستان کې څومره حکومتونه بدل شوي؛ خو یو حکومت هم د پاکستان د خوښې نهو، چې هر حکومت راځي د پاکستان جګړه ورسره روانه وي او د جګړې تر شا د لویو قدرتونو مالي ګټې پرتې دي.
د نوموړي په وینا؛ د دغه ګټو قرباني پښتانه دي او د دوی وینه تر ټولو زیات په خیبر پښتونخوا او بلوچستان کې تویېږي، په داسې حال کې چې د پاکستان په نورو سیمو کې امنیت شته. میا افتخار خبرداری ورکړ، که اوسنی حالات همداسې دوام وکړي؛ نو وضعیت به لا خطرناک شي او ښايي د کورنۍ جګړې بڼه خپله کړي.
هغه وویل، سوله د یادې خاورې د خلکو بنستیز حق دی او خلک د تاوتریخوالي پای ته رسېدل غواړي. د عوامي نشنل ګوند مشر له فدرالي او ایالتي حکومتونو وغوښتل، چې د خپلو شخصي ګټو لپاره جګړه ونه کړي؛ بلکې د ولس د ګټو لپاره کار وکړي او د ترهګرۍ پرضد د شلو نکاتو ملي تګلاره په بشپړه توګه عملي کړي.
هغه زیاته کړه، که د تاوتریخوالي د ختمولو رښتینې اراده موجوده وي؛ نو د ناامنۍ پای ته رسول ستونزمن کار نهدی، خو که دغه اراده نه وي، جګړه به دوام وکړي او نور کسان به ترې خپلې ګټې ترلاسه کوي او پښتانه به مري.
