د پاکستان د بلوچستان ایالت په بېلابېلو سیمو کې د تېرې ورځې په جلا، جلا پېښو کې ۱۴ کسان مړه، ۱۱ ټپیان او درې حکومتي کارکوونکي د وسلهوالو له خوا تښتول شوي دي. د راپورونو له مخې؛ یوازې په قلات ولسوالۍ کې درې، مستونګ کې یو او په پنجګور کې هم یو مړی موندل شوی دی.
بلخوا له ژوب نه کراچۍ ته د ناروغ لېږدوونکي پر موټر د منګوچر په سیمه کې ډزې شوې، چې له امله یې دوه ښځې وژل شوې او یوه ماشومه او دوه نور کسان ټپیان شوي دي. همدارنګه د مستونګ ولسوالۍ د محمد حسني پوستې ته نږدې د چاودېدونکو توکو په چاودنه کې یو موټر چلوونکی وژل شوی او پنځه نور ټپیان دي.
د کوټې ـ کراچۍ پر لویه لاره د سوراب په سیمه کې د دوو موټرو د ټکر له امله درې کسان مړه او څلور نور ټپیان شوي دي. په همدې حال کې د کوټې د کسټم په سیمه کې د تېلو د ټانکر (باوزر) د چاودنې له امله دوه کسان مړه شوي دي.
د ژوب په ولسوالۍ کې بیا د یوه دېوال نړېدو له امله یو ماشوم خپل ژوند له لاسه ورکړی دی.
له بلې خوا د چاغي ولسوالۍ د دالبندین ـ تفتان پر لویه لاره د محصولاتو (اکسایز) ادارې پر یوې لنډمهاله پوستې د ناپېژاندو وسلهوالو له برید وروسته د یادې ادارې درې کارکوونکي تښتول شوي دي.
د پولیسو په وینا؛ شاوخوا ۳۰ وسلهوالو پوسته کلابنده کړه، پر دندې بوخت کارکوونکي یې برمته کړل او له ځان سره یې یووړل. بریدګرو د اکسایز ادارې دوه دولتي موټر او وسلې هم له ځان سره وړې دي.
پولیسو او نورو امنیتي ځواکونو سیمه کلابنده کړې او د تښتوونکو او برمته شویو کارکوونکو د موندلو لپاره یې د پلټنې عملیات پیل کړي دي.
