د خیبر پښتونخوا د حکومت لوړپوړو چارواکو ویلي، په دغه ایالت کې د وسلهوالو د تمویل، وسلو، مهماتو او د استخباراتي معلوماتو د برابرولو شبکو او سرچینو د لهمنځه وړلو لپاره جدي اقدامات روان دي. په دې وروستیو کې په دغه ایالت کې د ناامنیو لمن ډېره پراخه شوې ده.
د خیبر پښتونخوا د اعلی وزیر د کورنیو او قبایلي چارو سلاکار طارق سعید مروت او د ایالت سکرتر شهاب علي شاه د جمعې په ورځ (د زمري ۲مه) په ډېره اسماعیل خان کې له لوړپوړو پولیس چارواکو سره په ګډه خبري غونډه کې وویل، حکومت د وسلهوالو پر ضد مبارزه کې د پام وړ اقدامات کوي.
طارق سعید مروت وویل، د خیبر پښتونخوا د سویلي ولسوالیو په ګډون په ټول ایالت کې د امنیت د ټینګښت لپاره همغږي او پراخ اقدامات روان دي.
هغه زیاته کړه، چې د سویلي سیمو په پنځو ولسوالیو کې د پولیسو وړتیاوې لا پیاوړې کېږي او د ایالت ولس، پولیس، امنیتي ځواکونه او حکومت به په ګډه د وسلهوالو هر ډول پلان شنډ کړي او یو خوندي، سولهییز او سوکاله خیبر پښتونخوا به رامنځته کړي.
د ایالت سکرتر شهاب علي شاه وویل، تر هغو چې حکومت، امنیتي ځواکونه، رسنۍ او ولس په ګډه د وسلهوالو پر ضد یو موټی نهوي، د دې پدیدې پر وړاندې چټکه بریا ترلاسه کېدای نهشي.
دا څرګندونې داسې مهال شوي، چې تېره شپه (پنجنشنبه د زمري لومړۍ) د ډېره اسماعیل خان سره څنګ ته پرتې ټانک ولسوالۍ کې وسلهوالو د پوځ او پولیسو پر یوې ګډې پوستې برید کړی وو.
د پاکستان پوځ ویلي، په دغه برید کې ۱۲ پوځیان، دوه پولیس او د ځنګلاتو ادارې یو چارواکی وژل شوي دي. پوځ ادعا کړې، چې په ځوابي عملیاتو کې یې ۱۲ وسلهوال هم وژلي دي.
د دغه برید مسوولیت د تحریک طالبان پاکستان یا ټيټيپي منلی دی.
