په خېبر پښتونخوا کې (د جولای له ۱۹مې) نېټې راهیسې د سختو ورښتونو او ناڅاپي سېلابونو له امله په بېلابېلو پېښو کې ۲۸ کسان مړه او ۲۹ نور ټپیان شوي دي. د خېبر پښتونخوا د طبیعي پېښو پر وړاندې د مبارزې ادارې په وینا؛ په مړو شویو کسانو کې ۱۰ نارینه، ۱۵ ماشومان او ۳ ښځې شاملې دي.
یادې ادارې ویلي، چې په ټپیانو کې ۱۳ نارینه، ۹ ښځې او ۷ ماشومان شامل دي. نوموړې ادارې زیاته کړې، چې ډېری مرګ ژوبله د کورونو د چتونو او دېوالونو پرېوتو او یا هم د سېلابي له امله رامنځته شوې ده.
د خېبر پښتونخوا د طبیعي پېښو پر وړاندې د مبارزې ادارې ویلي، د بارانونو او سېلابونو له امله ټولټال ۴۷ کورونه زیانمن شوي چې له ډلې یې ۳۷ کورونه برسېرن او ۱۰ نور په بشپړه توګه ویجاړ شوي دي.
له طبیعي پېښو د اغېزمن شویو ولسوالیو په ډله کې پېښور نوښار، خېبر، مردان، بونېر، باجوړ، شانګله، صوابۍ، بر او کوز چترال، بر او کوز دېر، اېبټاباد، مانسهره، هريپور، بر کوهستان، ټانک، تورغر، کورمه، شمالي وزیرستان او سویلي وزیرستان شامل دي.
