د پاکستان د بلوچستان ایالت د کیچ ولسوالۍ پولیسو د یو لړ عملیاتو پرمهال ۲۸ بېاسناده افغان کډوال نیولي دي. د کیچ پولیسو په خبرپاڼه کې راغلي، دغه کسان د هیرونک په امنیتي پوستې کې د یوه مساپر وړونکي موټر د پلټنې پرمهال نیول شوي دي.
د پولیسو په وینا؛ په نیول شویو کسانو کې ۱۴ نارینه، اته ښځې او شپږ ماشومان شامل دي، چې د سفر یا استوګنې قانوني اسناد یې نهلرل. ځایي چارواکي وایي، ټول نیول شوي کسان د پولیسو مرکز ته لېږدول شوي او د قانوني پړاوونو تر بشپړېدو وروسته به د پاکستان د کډوالۍ له قوانینو سره سم پرې اقدام وشي.
د بلوچستان پولیسو ویلي، په دغه ایالت کې د ننوتلو او تګراتګ پر مهمو لارو امنیتي پلټنې زیاتې شوې؛ څو بېاسناده افغان کډوال وپېژندل شي او د کډوالۍ د قوانینو پلي کېدل ډاډمن شي.
د افغانستان انټرنشنل د راټولو شویو شمېرو له مخې؛ د روان کال له جون راهیسې یوازې د بلوچستان په چاغۍ ولسوالۍ کې ۳۳۲ افغانان نیول شوي، چې ګڼو یې د ایران له لارې اروپا ته د تګ هڅه کوله.
همدارنګه د روان کال د مئ په نهمه هم په همدې ولسوالۍ کې د یوې ترافیکي پېښې له امله ۱۰ افغانان مړه او پنځه نور ټپیان شوي وو.
