د طالبانو تر ادارې لاندې د پېښو پر وړاندې د چمتووالي ادارې خبرداری ورکړی چې د زمري له ۸مې تر ۱۴مې پورې د افغانستان په ختیځو او سوېلختیځو سیمو کې د ناڅاپي سېلابونو د راوتلو احتمال شته. ادارې همداراز ویلي، په یو شمېر ولایتونو کې به د تودوخې درجه د نورمال حالت په پرتله لوړه وي.
دغه ادارې د افغانستان د خطرونو په اړه په خپلې اوونیزې وړاندوینې کې ویلي، چې د زمري له ۸مې تر ۱۴مې نېټې پورې د هېواد په ختیځو او سوېلختیځو سیمو کې د ناڅاپي سېلابونو د رامنځته کېدو خطر شته.
د ادارې د خبرپاڼې له مخې، د نورستان، کونړ، ننګرهار، خوست، پکتیا او پکتیکا په غرنیو سیمو او ځینو نورو سیمو کې، د وروستیو ورښتونو او د راتلونکو احتمالي بارانونو له امله د ناڅاپي سېلابونو احتمال موجود دی. د وړاندوینې له مخې، په یادو سیمو کې به د اعتبار مودې پر مهال له ۱۰ تر ۲۵ میلیمترو پورې باران وشي.
ادارې همداراز ویلي، چې د تېرو ۳۰ ورځو د بارانونو له امله په ختیځو او سوېلختیځو سیمو کې د وچکالۍ او غیرعادي وچوالي وضعیت ښه شوی او د غیرعادي وچوالي حالت له منځه تللی دی.
د خبرپاڼې له مخې، په همدې موده کې به د افغانستان په شمالي، شمالختیځو، مرکزي، ختیځو او سوېلختیځو سیمو کې د اوونیزې منځنۍ اعظمي تودوخې درجه د نورمال حالت په پرتله له یو تر څلورو سانتيګرادو لوړه وي او په شمالي او سوېلي سیمو کې به اعظمي تودوخه له ۴۰ تر ۴۵ سانتيګرادو پورې ورسېږي.
ادارې یادونه کړې چې په دې وړاندوینه کې یوازې هغه هوايي وضعیتونه شامل دي چې د خطر د رامنځته کېدو احتمال لري او عادي ورښتونه او عادي تودوخه پکې نه ده شامله.
